07:21, 27 - شىلدە 2021 | GMT +6
قىتايعا جويقىن داۋىل تاياپ قالدى: 1,6 ميلليوننان استام ادام ەۆاكۋاتسيالاندى
شانحاي. قازاقپارات - قىتاي بيلىگى ينفا تروپيكالىق داۋىلىنا بايلانىستى شىعىس جىجياڭ پروۆينسياسىندا 1,6 ميلليوننان استام ادامدى ەۆاكۋاتسيالادى، دەپ حابارلايدى قازاقپارات Global Times باسىلىمىنا سىلتەمە جاساپ.
داۋىلدىڭ جاقىنداۋىنا بايلانىستى ق ح ر دامۋ جانە رەفورمالار جونىندەگى مەملەكەتتىك كوميتەتى دۇيسەنبىدە تەمىرجول كولىگى مەن مەتروپوليتەن جۇمىسىن توقتاتۋعا كەڭەس بەردى. سونداي- اق جەرگىلىكتى بيلىك ورگاندارىنا توتەنشە جاعدايلاردى جويۋدىڭ ءبىرىنشى دەڭگەيىن ەنگىزۋ ۇسىنىلدى. قىتايدىڭ ورتالىق مەتەورولوگيالىق قىزمەتىنىڭ حابارلاۋىنشا، دۇيسەنبىدە جەرگىلىكتى ۋاقىت بويىنشا 09: 50-دە ينفا داۋىلى جىجياڭ پروۆينسياسىنىڭ جاعالاۋىنا جەتتى. جەلدىڭ ماكسيمالدى كۇشى 10 بالل.
مەتەورولوگتاردىڭ ايتۋىنشا، جويقىن داۋىل قىتايدىڭ شىعىسىنداعى شانحاي، جىجياڭ، جيانسۋ جانە باسقا اۋداندارعا زيان كەلتىرۋى مۇمكىن. ساراپشىلار ايماقتا جاۋىن- شاشىن 29-شىلدەگە دەيىن جالعاسادى دەپ بولجاپ وتىر. تەڭىز جاعالاۋىنداعى جىجياڭ مەن شانحايداعى تۋريزم نىسانداردىڭ جۇمىسى توقتاتىلدى.