07:35, 26 - شىلدە 2021 | GMT +6
تەمىرتاۋدا بالالار توبەلەسىنەن كەيىن 12 جاسار جەتكىنشەك مەرت بولدى
تەمىرتاۋ. قازاقپارات - تەمىرتاۋدا ولىمگە اپارىپ سوقتىرعان بالالاردىڭ توبەلەسى بەينەجازباعا ءتۇسىپ قالدى، دەپ حابارلايدى قازاقپارات Polisia.kz رەسۋرسىنا سىلتەمە جاساپ.
24-شىلدەدە ەسكى قالالىق پوليتسيا ءبولىمىنىڭ كەزەكشى بولىمىنە تەمىرتاۋداعى قالالىق بالالار اۋرۋحاناسىندا 12 جاستاعى قالا تۇرعىنى قايتىس بولدى دەگەن حابارلاما كەلىپ ءتۇستى. پوليتسەيلەر انىقتاعانداي، زارداپ شەككەن بالا قالا ۇيلەرىنىڭ ءبىرىنىڭ اۋلاسىندا 13 جاستاعى بالامەن ۇرسىسىپ قالعان. جانجالدىڭ سوڭى توبەلەسكە ۇلاسىپ، الگى بالا جاراقات العان.
ولاردىڭ توبەلەسى بەينەجازباعا ءتۇسىپ قالعان جانە Instagram پاراقشالارىنىڭ بىرىندە جاريالانعان. «وقيعا ق ر قىلمىستىق كودەكسىنىڭ 104-بابى بويىنشا تىركەلدى. ءتيىستى ساراپتامالار تاعايىندالدى، سوتقا دەيىنگى تەرگەۋ ءجۇرىپ جاتىر»، - دەدى قاراعاندى وبلىستىق پوليتسيا دەپارتامەنتى تەرگەۋ باسقارماسىنىڭ باستىعى رۋستام قۇلكەيەۆ.
اۆتور: گۇلزات اقجولوۆا