وتكەن جىلى 13 مىڭ ەتنيكالىق قازاق كوشىپ كەلدى

بۇل تۋرالى ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ كەڭەيتىلگەن القا ماجىلىسىندە ۆەدومستۆو باسشىسى سەرىك شاپكەنوۆ ءمالىم ەتتى، دەپ حابارلايدى قازاقپارات ءتىلشىسى.

مينيستر ەتنيكالىق كوشى-قوندى ىنتالاندىرۋ اياسىندا 2020 -جىلى رەسپۋبليكاعا 7 مىڭنان استام وتباسى نەمەسە 13 مىڭ ەتنيكالىق قازاق كەلگەنىن، ونىڭ ىشىندە 396 قانداس وتباسى قابىلداۋ وڭىرلەرىندە (شىعىس قازاقستان، سولتۇستىك قازاقستان، اقمولا، پاۆلودار، قوستاناي وبلىستارى) قونىستانعانىن ايتتى.

ەل ەكونوميكاسىن بىلىكتى شەتەلدىك ماماندارمەن قامتاماسىز ەتۋ بويىنشا شارالار قابىلدانىپ جاتىر. 2020 -جىلى بولىنگەن كۆوتا اياسىندا جەرگىلىكتى اتقارۋشى ورگاندار شەتەلدىك جۇمىس كۇشىن تارتۋعا 17,3 مىڭ رۇقسات بەردى. قازاقستاندىق قىزمەتكەرلەردىڭ مۇددەلەرىن ەسكەرە وتىرىپ، بيىلعا كۆوتا رەسپۋبليكاداعى جۇمىس كۇشىنىڭ سانىنا قاتىستى 0,31 پايىزدى قۇرادى.

قولدانىستاعى كوشى- قون جۇيەسىن جەتىلدىرۋ ماقساتىندا وتكەن جىلى زاڭناماعا ەلگە كەلەتىن قونىس اۋدارۋشىلار مەن ەتنيكالىق رەپاتريانتتارعا قولايلى جاعدايلار جاساۋدى؛ شەتەلدىك جۇمىس كۇشىن تارتاتىن جۇمىس بەرۋشىلەردىڭ شەتەلدىك بىلىكتى قىزمەتكەرلەردى قازاقستاندىق كادرلارمەن الماستىرۋ جونىندەگى مىندەتتەمەلەرىن كوزدەيتىن تۇزەتۋلەر ەنگىزىلدى.

«كوشى- قون قاتىناستارىن ودان ءارى دامىتۋ اياسىندا 2021 -جىلى ءۇش نەگىزگى مىندەت ايقىندالدى. ءبىرىنشىسى - قازاقستان رەسپۋبليكاسى كوشى- قون ساياساتىنىڭ 2022-2026 -جىلدارعا ارنالعان جاڭا تۇجىرىمداماسىن قابىلداۋ. ەكىنشىسى - قازاقستاندىق قىزمەتكەرلەردى شەتەلدە جۇمىسقا ورنالاستىرۋ جانە قۇقىقتىق قورعاۋ بولىگىندە ءتيىستى جۇيەنى ەنگىزۋ. ءۇشىنشىسى - كادرلارداعى قازاقستاندىق قامتۋدى قامتاماسىز ەتۋ كەمىندە 97 پايىز دەڭگەيىندە ساقتالادى»، - دەدى سەرىك شاپكەنوۆ.

اۆتور: رۋسلان عابباسوۆ