ءبىرتانوۆ ءىسى: سوتقا 141 توم ماتەريال تۇسكەن

الدىن الا تىڭداۋ بارىسىندا قورعاۋشى سەرىك ساعاليەۆ ەلجان ءبىرتانوۆتىڭ وزىنە تاعىلعان ايىپتاردى مويىندامايتىنىن ايتتى.

«ءبىزدىڭ قورعاۋىمىزداعى ە. ءبىرتانوۆ سوتقا دەيىنگى تەرگەۋ بارىسىندا دا تاعىلعان ايىپتى مويىنداعان جوق قازىر دە مويىندامايدى»، - دەدى ول.

نۇر-سۇلتان قالاسى سارىارقا اۋداندىق 2№ سوتىنىڭ سۋدياسى يبراگيم الكەنوۆ ايىپتالۋشى تاراپتان ءىس ماتەريالدارىنا قاتىستى قانداي دا ءبىر قارسىلىق، شاعىمدارى بار-جوعىن سۇرادى. ەكس-مينيستر ەلجان ءبىرتانوۆ پەن ونىڭ ورىنباسارى بولعان ولجاس ابىشيەۆتىڭ ادۆوكاتتارى ايىپتاۋ ماتەريالىمەن تانىسىپ ۇلگەرمەگەنىن ايتىپ، قۇجاتتارمەن تولىق تانىسىپ شىعۋعا مۇمكىندىك بەرۋدى سۇرادى. ال كۇدىكتى ولجاس ابىشيەۆتىڭ ءوزى مەملەكەتتىك ءىس ماتەريالىنىڭ ناقتى كولەمى تۋرالى بۇگىن عانا شىنايى اقپارات العانىن ايتتى.

«بۇگىن مەن بىلەتىن 133 تومنان باسقا تاعى 4 توم بار ەكەنىن ءبىرىنشى رەت ەستىپ تۇرمىن. بۇل مەن ءۇشىن جاڭا مالىمەت. رەسمي تۇردە مالىمدەگىم كەلەدى، نەگە تەرگەۋ ورگانى بۇل تومداردى جاسىرىپ قالعان؟ ماقساتتارى قانداي بولعان؟ 133 توم بار دەپ جۇرگەنبىز. بۇگىن تاعى 4 توم بار دەپ وتىر. سوندا بارلىعى 137 توم بولىپ شىعادى. بۇل 4 توم تۋرالى بىزگە نەگە ەشكىم ايتقان جوق؟»، - دەدى ولجاس ابىشيەۆ.

سۋديا يبراگيم الكەنوۆ بۇل سۇراقتى ەرتەڭگى تىڭداۋدا پروتسەسسۋالدىق پروكۋرورعا قويۋعا كەڭەس بەردى.

ونىڭ ايتۋىنا قاراعاندا، ە. ءبىرتانوۆتىڭ ءىسى بويىنشا سوتقا 141 توم ماتەريال تۇسكەن.

«سوتقا ايىپتاۋ اكتىلەرىن قوسقاندا 141 توم ماتەريال كەلىپ ءتۇستى»، - دەدى سۋديا.

اتالمىش ءىس بويىنشا الدىن الا تىڭداۋ ەرتەڭ، ياعني، 27- قاڭتار كۇنى ساعات 15.00 دە جالعاساتىن بولدى.

ايتا كەتەيىك، 17- قاڭتاردا بۇرىنعى دەنساۋلىق ساقتاۋ ءمينيسترى ەلجان ءبىرتانوۆتىڭ ۇستىنەن قوزعالعان قىلمىستىق ءىس سوتقا تۇسكەنى تۋرالى حابار تاراعان بولاتىن. ال 20- قاڭتاردا اتالمىش ءىس بويىنشا الدىن الا تىڭداۋ 26- قاڭتاردا وتەتىنى بەلگىلى بولدى.

ەلجان ءبىرتانوۆ 2020-جىلدىڭ 3- قاراشاسىندا بيۋجەت قاراجاتىن ىسىراپ ەتتى دەگەن كۇدىكپەن قاماۋعا الىنعان بولاتىن.