بيىل ەلوردادا 16 مەكتەپ سالىنادى

بۇل تۋرالى قازاقپارات elbasy.kz سايتىنا سىلتەمە جاساپ حابارلايدى.

كەزدەسۋدە ەلباسىعا ەلوردانىڭ ەكونوميكالىق دامۋى، قالانى گازداندىرۋ ۇدەرىسى، تۇرعىن ءۇي مەن الەۋمەتتىك-مادەني نىساندار قۇرىلىسى، سونداي-اق قوعامدىق جەرلەردى اباتتاندىرۋ تۋرالى اقپارات بەرىلدى.

«قولجەتىمدى باسپانا سالۋ كولەمى جىل ساناپ ارتىپ كەلەدى. بيىل 10 مىڭعا جۋىق پاتەر تاپسىرۋ جوسپارلانىپ وتىر. سونىمەن قاتار 42 مىڭ وقۋشىعا ارنالعان 16 مەكتەپ سالىنادى»، - دەدى ا. كولگىنوۆ.

سونىمەن بىرگە قالا اكىمى نۇرسۇلتان نازاربايەۆقا ەلوردانىڭ «جاسىل بەلدەۋىن» دامىتۋ جوسپارى، قالا اۋماعى مەن ساياباقتاردى كوگالداندىرۋ بويىنشا ىسكە اسىرىلىپ جاتقان شارالار تۋرالى باياندادى.

انىقتاما ءۇشىن: 2012-2020-جىلدارى «جاسىل بەلدەۋدە» 8127 گەكتار جەرگە 3174342 دانا اعاش كوشەتى وتىرعىزىلدى. ونىڭ 59,3 پايىزى جاپىراقتى، 40,7 پايىزى قىلقان جاپىراقتى اعاش. 636,6 گەكتارعا كوپجىلدىق ءشوپ ەگىلدى.

2021-جىلى «جاسىل بەلدەۋگە» 900 مىڭعا تارتا كوشەت وتىرعىزۋ جوسپارلانعان. قالا ىشىندە 100 مىڭعا جۋىق اعاش، كوشەت، بۇتا ەگىلەدى.