ارىستاعى جارىلىسقا كىنالى دەپ تانىلعان 16 ادام سوتتالدى

None
None
نۇر- سۇلتان. قازاقپارات - ارىس قالاسىنداعى اسكەري قويمادا 2019 -جىلى بولعان جارىلىسقا كىنالى دەپ تانىلعان 16 ادام ءتۇرلى مەرزىمگە باس بوستاندىعىنان ايىرىلدى، دەپ حابارلايدى قازاقپارات ءتىلشىسى.

سوت ءۇش ادامنىڭ ءومىرىن قيىپ، 30 ادامنىڭ جاراقات الۋىنا سەبەپكەر بولعان ارىستاعى جارىلىس بويىنشا قارالعان قىلمىستىق ءىستىڭ قورىتىندىسىن شىعاردى. شىمكەنت گارنيزونى اسكەري سوتىنىڭ باسپا ءسوز قىزمەتى تاراتقان مالىمەت بويىنشا، پروكۋرورلار سوتتالۋشىلارعا 4 جىلدان 10 جىلعا دەيىن باس بوستاندىعىنان ايىرۋ جازاسىن تاعايىنداۋدى جانە ازاماتتىق تالاپتاردى قاراۋسىز قالدىرۋدى سۇراعان. ال جابىرلەنۋشىلەردىڭ كوبى ءىستىڭ كۇرمەۋىن سوتتىڭ ۇيعارىمىنا قالدىرۋعا نيەت بىلدىرگەن.

«ايىپتالۋشى تاراپ پەن ونىڭ ادۆوكاتتارى كۇدىكتى رەتىندە تارتىلعان ازاماتتاردى اقتاپ، قىلمىستىق ءىستى توقتاتۋدى سۇرادى. قورعانىس مينيسترلىگى مەن اسكەري ءبولىمنىڭ باسشىلىق قۇرامى قىزمەتكە نەمقۇرايدى قاراعانى ءۇشىن (قىلمىستىق كودەكستىڭ 453-بابى 2-بولىگى)، اتاپ ايتقاندا، قىزمەتتىك مىندەتتەردىڭ ورىندالۋىن باقىلاۋ جونىندەگى شارالاردى قولدانباي، وق- دارىمەن جۇمىس ىستەۋ ەرەجەسىن بۇزعانى ءۇشىن (ق ك 462-بابى 3-بولىگى) كىنالى دەپ تانىلدى»، - دەپ جازادى سوتتىڭ باسپا ءسوز قىزمەتى.

سوتتالعانداردىڭ ىشىندە ەڭ ۇزاق مەرزىمدى اسكەري ماقساتقا بولىنگەن قاراجاتتى جىمقىردى دەپ ايىپتالعان كۇدىكتىلەر ارقالادى. ناقتىراق ايتساق، اۋداندىق پايدالانۋ ءبولىمىنىڭ باسشىلىعى مەن اسكەري ءبولىم كومانديرى تەحنيكالىق كۇزەت قۇالدارىن مونتاجداۋعا بولىنگەن بيۋدجەت اقشاسىن جىمقىرعانى ءۇشىن 7 جانە 10 جىلعا باس بوستاندىعىنان ايىرىلدى. قوسىمشا جازا رەتىندە اتالعان تۇلعالارعا مەملەكەتتىك قىزمەت پەن كۆازيمەملەكەتتىك سەكتوردا لاۋازىمدى قىزمەت اتقارۋعا تىيىم سالىندى. سوتقا ىسپەن بىرگە ۇسىنىلعان ازاماتتىق تالاپتار قاراۋسىز قالدىرىلدى. ءىستىڭ بۇل بولىگىندە جوندەۋ جۇمىستارىن جۇرگىزگەن مەردىگەر ۇيىمدار مەن مەنشىك يەلەرى اراسىنداعى داۋدىڭ بولۋىنا بايلانىستى ازاماتتىق سوت وندىرىسىنە جۇگىنۋ ۇسىنىلدى.

«سوت ۇكىمى ءالى زاڭدى كۇشىنە ەنگەن جوق. تاراپتار ونىمەن كەلىسپەگەن جاعدايدا قىلمىستىق ءىس جۇرگىزۋ كودەكسىنىڭ 31-بابى بويىنشا جوعارى تۇرعان سوتقا شاعىم بەرۋگە قۇقىلى. قىلمىستىق ءىس 550 تومنان تۇردى. ءىس بويىنشا 1473 جابىرلەنۋشىدەن جاۋاپ الىندى. سوتقا قاتىسۋشىلاردىڭ كوپتىگىنە جانە سوت وتىرىستارىن سوعان ساي زالدا وتكىزۋ قاجەتتىلىگىنە بايلانىستى ءىس رەجيمدىك وبەكتى - اسكەري بولىمدە قارالدى. ونىڭ اۋماعىنا ازاماتتاردى جىبەرۋ نىساننىڭ قولباسشىلىعىنىڭ رۇقساتىمەن عانا ىسكە اسىرىلدى»، - دەپ جازىلعان رەسمي مالىمەتتە.

شىمكەنت گارنيزونى اسكەري سوتىنىڭ باسپا ءسوز قىزمەتى ۇكىمدى جاريالاۋ كەزىندە ونلاين قاتىسۋ مۇمكىندىگى ۇسىنىلماعانىن مالىمدەپ وتىر. وعان اسكەري نىساننىڭ جانىندا قىلمىستىق اتقارۋ جۇيەسىنىڭ مەكەمەسى تۇرۋى سەبەپ بولعان.

«اتالمىش نىساندا ۇيالى بايلانىستى تەجەيتىن قوندىرعى ورناتىلعان. سوندىقتان ۇكىم وقۋ كەزىندە ونلاين قوسىلۋعا تەحنيكالىق مۇمكىندىك بولمادى»، - دەپ جازادى سوتتىڭ باسپا ءسوز قىزمەتى.

سوڭعى جاڭالىقتار