قازاقستاندا ەكولوگيالىق پروبلەمالاردى شەشۋ ءۇشىن 17 جول كارتاسى ازىرلەندى
مينيستر جاڭا ەكولوگيالىق كودەكستىڭ پارلامەنت ماجىلىسىندە ەكىنشى وقىلىمدا قابىلدانعانىن ەسكە سالدى. ونىڭ ايتۋىنشا، جاڭا كودەكس قورشاعان ورتاعا كەلەتىن زياندى ەداۋىر تومەندەتۋگە باعىتتالعان.
«ايتسە دە، جاڭا ەكولوگيالىق كودەكستى كۇتپەي «حالىق ۇنىنە قۇلاق اساتىن مەملەكەت» تۇجىرىمداماسىن نەگىزگە الا وتىرىپ، ەكولوگيالىق پروبلەمالار مەن ولاردى شەشۋ جولدارىن بارلىق وڭىردەگى جۇرتشىلىقپەن، اسىرەسە ەكوبەلسەندىلەرمەن بىرگە قاراستىردىق. بارلىعى 17 ونلاين كەزدەسۋ وتكىزىلدى. 25 مىڭعا جۋىق ادام قاتىستى. تالقىلاۋ ناتيجەسى بويىنشا جۇرتشىلىقپەن، اكىمدىكتەرمەن جانە تابيعات پايدالانۋشىلارمەن بىرلەسىپ، 17 جول كارتاسى ازىرلەندى. بۇل قۇجاتتاردا وڭىرلەردەگى ەكولوگيالىق احۋالدى جاقسارتۋ جونىندەگى ناقتى شارالار قاراستىرىلعان»، - دەدى ماعزۇم مىرزاعاليەۆ.
مينيستر بۇل تۇرعىدا نەگىزگى ەكولوگيالىق پروبلەمالاردى اتادى. بۇل - اتموسفەرالىق اۋا مەن جەر بەتىندەگى سۋدىڭ لاستانۋى، قالدىقتارمەن بايلانىستى جۇمىستىڭ جەتىلمەگەن جۇيەسى، سونداي-اق ەجەلدەن لاستانعان جەرلەر مەن كوگالداندىرۋدىڭ جەتىسپەۋشىلىگى.