تولىققاندى جۇمىس ىستەۋى ءۇشىن «عىلىم قورىنا» 200 ميلليارد تەڭگە ءبولۋ قاجەت - سەناتور

«بۇكىل الەمدە تەحنولوگيالاردى كوممەرتسيالاندىرۋعا مەملەكەت بارىنشا از قارجى سالادى. دەگەنمەن، قازاقستان بيزنەسىنىڭ ءالى اياعىنان نىق تۇرماعاندىعىن ەسكەرسەك، ەلدەگى قارجىلاندىرۋ ماردىمسىز ەكەندىگى تۇسىنىكتى. سوندىقتان مەملەكەتتىڭ كوممەرتسيالاندىرۋدى قولداۋ شارالارى تاياۋ 5-10 جىل ىشىندە بايىپتى ءارى ەلەۋلى بولۋى ءتيىس. ولجاس قۇدايبەرگەنوۆتىڭ عىلىم قورىنا جەر قويناۋىن پايدالانۋشىلاردىڭ 1 پايىزىن تارتۋ جوسپارى بار. بۇل وتە جاقسى. عىلىم قورىن قارجىلاندىرۋدى تولىقتاي قاراستىرۋ قاجەت. ارىن ورسارييەۆكە (عىلىم قورىنىڭ ءتوراعاسى) كەمىندە 200 ميلليارد تەڭگە ءبولۋ قاجەتتى تۋرالى كەڭەس بەرگىم كەلەدى. سوندا عانا قور تولىققاندى جۇمىس ىستەيدى. بۇل اكسيونەرلىك قوعام جانە جارعىلىق قورىن بارلىق ۋاقىتتا تولىقتىرۋعا بولادى»، - دەدى سەناتور ەلوردادا ءوتىپ جاتقان تەحنولوگيالاردى كومەرتسيالاندىرۋ جونىندەگى فورۋمدا.

سونىمەن قاتار ول وتاندىق عىلىمنىڭ دامۋىنا بولىنەتىن قارجىنىڭ ماردىمسىز بولۋى كەدەرگى كەلتىرىپ وتىرعاندىعىن ايتتى.

«بيىل ق ر ۇكىمەتى جانىنداعى جوعارى عىلىمي- تەحنيكالىق كوميسسيانىڭ وتىرىسىندا ماقساتتى قارجىلاندىرۋ باعدارلاماسىن 65 پايىزعا ۇلعايتتى. بۇل جاقسى كورسەتكىش. گرانتتىق قارجىلاندىرۋ 115 پايىزعا، ياعني 2 ەسەدەن استامعا ارتتىرىلدى. ال تەحنولوگيالاردى كوممەرتسيالاندىرۋ 5,4 ميلليارد تەڭگە دەيىندە قالۋى وكىنىشتى- اق. بۇل جەردە تۇسىنبەستىك بولعان سياقتى. مۇندا قوردىڭ دا كىناسى بار. 38 ميلليارد تەڭگەدەن استام قاراجاتقا 153 جوبا جۇزەگە اسىرىلىپ جاتىر. عىلىم قورى جۇمىس ىستەگەن 5 جىلدىڭ ىشىندە بيزنەستىڭ تەڭ قارجىلاندىرۋى 14,5 پايىز، شامامەن 5 ميلليارد تەڭگە بولدى»، - دەدى ب. جۇماعۇلوۆ.

اۆتور: مارلان جيەمباي