توكيو-2020: بۇگىن تاعى ەكى وتانداسىمىز جەڭىلىپ قالدى

None
None
توكيو. قازاقپارات - توكيو وليمپياداسىندا دزيۋدوشى ديدار حامزا العاشقى بەلدەسۋىندە قارسىلاسىنان جەڭىلىپ قالدى، دەپ حابارلايدى قازاقپارات.

قازاقستاندىق سپورتشى 81 كەلى سالماقتا تاتاميگە شىقتى. ول موڭعوليا اتىنان سىنعا ءتۇسىپ جاتقان يراندىق سايد موللايمەن كۇرەستى. سايد موللاي - تاجىريبەلى سپورتشىنىڭ ءبىرى. 2018 -جىلى الەم چەمپيونى اتانسا، سول جىلى ازيا ويىندارىندا كۇمىس جۇلدەگەر بولدى.

بەلدەسۋ بارىسىندا ديدار قارسىلاسىنا يپپون ادىسىمەن ەسە جىبەرىپ قويدى.

ەسكە سالساق، وليمپيادادا 60 كەلىدە ەلدوس سمەتوۆ قولا جۇلدەگەر اتاندى. ال وتگونسەسەگ گالبادراح (48 كەلى) پەن ەرلان سەرىكجانوۆ (66 كەلى) جارىس جولىنان شىعىپ قالدى.

سونداي -اق توكيو وليمپياداسىندا ساداق اتۋدان قازاقستاندىق سپورتشى دەنيس گانكين ەكىنشى كەزدەسۋىندە جەڭىلىپ قالدى.

العاشقى كەزدەسۋىندە ول ەگيپەتتىك يۋسۋف تولبادان 6:4 ەسەبىمەن باسىم تۇسكەن ەدى. ال، ەكىنشى كەزدەسۋىندە يتاليالىق ماۋرو نەسپوليگە ەسە جىبەردى. ەسەپ 2:6.


قازاقستاندىق سپورتشى وسىلايشا وليمپيادانى ەرتە اياقتاۋعا ءماجبۇر بولدى. ەندى قازاقستان ساپىنان يلفات ابدۋللين مەن سانجار مۇسايەۆ سىنعا تۇسەدى. ال كوماندالىق باسەكەدە قازاقستان ۇندىستانمەن كۇش سىناسادى. بيىل ءدۇبىرلى دودادا 33 سپورت تۇرىنەن 339 مەدال جيىنتىعى ساراپقا سالىنادى. ايتۋلى الامانعا جەر بەتىندەگى 206 مەملەكەتتەن 11 مىڭنان استام سپورتشى قاتىسۋدا.

قازاقستاندىق 97 سپورتشى كۇنشىعىس ەلىندە سپورتتىڭ 28 تۇرىنەن باق سىنايدى.

ايتا كەتەيىك، قازىر قازاقستان قۇراماسىنىڭ قورجىنىندا ءۇش قولا مەدال بار. العاشقىسىن 24-شىلدەدە دزيۋدوشى ەلدوس سمەتوۆ يەمدەنسە، ەكىنشىسىنە 25-شىلدەدە اۋىر اتلەت يگور سون قول جەتكىزدى. تاعى ءبىر اۋىر اتلەتىمىز زۋلفيا چينشانلو 26-شىلدەدە تاعى ءبىر قولامەن جۇلدە قورىن تولىقتىردى.

سوڭعى جاڭالىقتار