17:21, 27 - شىلدە 2021 | GMT +6
توكيو-2020: ۆاسيلي ليەۆيت قارسىلاسىنا نوكاۋتپەن جەڭىلدى
توكيو. قازاقپارات - توكيو وليمپياداسىندا سىنعا ءتۇسىپ جاتقان بوكسشى ۆاسيلي ليەۆيت العاشقى كەزدەسۋىندە جارىس جولىنان شىعىپ قالدى، دەپ حابارلايدى قازاقپارات.
قازاقستاندىق سپورتشى 91 كەلىدە يسپانيالىق ەممانۋەل رەيەس پلامەن جەكپە- جەككە شىقتى. تارتىستى باسەكە ەكىنشى راۋندتا قازاقستاندىق بوكسشىنىڭ نوكاۋتىمەن اياقتالدى. وسىلايشا ول جارىس جولىنان شىعىپ قالدى. شيرەك فينالدا يسپانيالىق بوكسشى كۋبالىق حۋليو لا كرۋسپەن قولعاپ تۇيىستىرەدى. ول 2016 -جىلى ريو وليمپياداسىندا چەمپيون اتاعىن جەڭىپ العان.
وليمپياداعا ەلىمىزدىڭ اتىنان 9 بوكسشى باردى. ونىڭ 8 ءى ەرلەر، 1 ءى قىزدار اراسىندا سىنعا تۇسەدى. قازىرگە دەيىن سەرىك تەمىرجانوۆ (57 كەلى)، زاكير سافيۋللين (63 كەلى) جانە ساكەن بيبوسىنوۆ (52 كەلى) العاشقى جەكپە- جەگىندە جەڭىسكە جەتىپ، جارىستى جالعاستىرۋعا مۇمكىندىك الدى.
ال بۇگىن ابىلايحان ءجۇسىپوۆ (69 كەلى) قارسىلاسىنا ەسە جىبەرىپ قويدى.