باكۋدەگى سامميتتە نۇرسۇلتان نازاربايەۆ «تۇركى كەلەشەگى-2040» باعدارلاماسىن ازىرلەۋدى ۇسىندى

 دەپ حابارلايدى قازاقپارات ءتىلشىسى  Еlbasy.kzاقپارات كوزىنە سىلتەمە جاساپ.

«ىنتىماقتاستىق مەرەيتويىندا ءبىز جاقسى ناتيجەلەرگە قول جەتكىزدىك. بىرىنشىدەن، جاھاندىق جانە وزىندىك كوزقاراس تۇرعىسىنان ءوز ۇيىمىمىزدىڭ ماڭىزدىلىعى مەن قاجەتتىلىگىن دالەلدەدىك. ەكىنشىدەن، كەڭەس قۇرامىنا وزبەكستان مەن ماجارستان كىردى. وسىلايشا ءبىز ءوز شەجىرەلەرىمىزدىڭ جاڭا پاراعىن اشتىق. ۇشىنشىدەن، مەملەكەتتەرىمىز ەلەۋلى ينستيتۋتسيونالدى ساۋلەت قالىپتاستىردى. تورتىنشىدەن، ايماقتىق جانە حالىقارالىق دەڭگەيدە ۇيىمنىڭ بەدەلى ارتتى. بەسىنشىدەن، ءبىز تۇركى الەمىنىڭ ينتەگراتسياسى تۇجىرىمداماسىن قابىلدادىق»، - دەدى ەلباسى.

تۇركى ينتەگراتسياسى پروتسەسىن جالعاستىرۋدىڭ ماڭىزدىلىعىن اتاپ وتكەن قازاقستاننىڭ تۇڭعىش پرەزيدەنتى تۇركى كەڭەسىن ودان ءارى دامىتۋدا ءوز نۇسقاسىن جاريالادى.

«بىرىنشىدەن، مەن «تۇركى كەلەشەگى- 2040» باعدارلاماسىن ازىرلەۋدى ۇسىنامىن. بۇل قۇجاتتا تۇركىتىلدەس قوعامداستىقتىڭ ۇزاق مەرزىمدى ماقساتتارى مەن ولارعا جەتۋ جولدارى كورسەتىلۋى كەرەك. وسىنىڭ ارقاسىندا سىرتقى جانە ەنەرگەتيكالىق ساياسات، ساۋدا جانە ترانزيت، تۋريزم جانە ينۆەستيتسيالار، ەنەرگەتيكا جانە جاسىل ەكونوميكا، شاعىن جانە ورتا بيزنەس سياقتى باسىم باعىتتارداعى ىنتىماقتاستىقتى نىعايتۋعا ايتارلىقتاي سەرپىن بەرەمىز»، - دەدى نۇرسۇلتان نازاربايەۆ.

سونىمەن قاتار، ەلباسى اتالمىش باعدارلاماعا مادەني جانە ءبىلىم بەرۋ، جاستار ساياساتى مەن دەنساۋلىق ساقتاۋ، تسيفرلاندىرۋ جانە جاساندى ينتەللەكت سالالارىنداعى ءىس- شارالاردى ەنگىزۋ قاجەتتىلىگىن اتاپ ءوتتى.

قازاقستاننىڭ تۇڭعىش پرەزيدەنتى سونىمەن بىرگە، «تۇركى الەمىنىڭ بەسىگى» - تۇركىستان قالاسىن دامىتۋدىڭ ماڭىزدىلىعىنا نازار اۋداردى.

«ەكىنشىدەن، مەن بولاشاقتا كەڭەسىمىزدىڭ اتاۋىن قايتا قاراۋدى ۇسىنامىن. مەن تۇركىتىلدەس مەملەكەتتەردىڭ ىنتىماقتاستىق كەڭەسىن ۇيىم دەڭگەيىنە كوتەرۋگە بولادى دەپ سانايمىن. وسىلايشا، ءبىزدىڭ قۇرىلىمدى «تۇركى مەملەكەتتەرىنىڭ ۇيىمى» دەپ اتاۋعا بولادى»، - دەدى نۇرسۇلتان نازاربايەۆ.

ەسكە سالا كەتسەك، بۇگىن ازەربايجان استاناسىندا تۇركىتىلدەس مەملەكەتتەر ىنتىماقتاستىق كەڭەسىنە مۇشە مەملەكەتتەر باسشىلارىنىڭ 7-  سامميتى ءوتتى. شاراعا تمىك ەلدەرىنىڭ باسشىلارى - تۇركيا پرەزيدەنتى رەجەپ ەردوعان، ازەربايجان پرەزيدەنتى يلحام اليەۆ، قىرعىزستان پرەزيدەنتى سوورونباي جەەنبەكوۆ، سونداي- اق قازاقستاننىڭ تۇڭعىش پرەزيدەنتى - ەلباسى نۇرسۇلتان نازاربايەۆ قاتىستى.

بيىل قازاقستان، تۇركيا، ازەربايجان جانە قىرعىزستان پرەزيدەنتتەرى قول قويعان تاريحي قۇجات - ناحچىۆان دەكلاراتسياسىنا تۋرا 10 جىل تولىپ وتىر. 2009 -جىلى ازەربايجاننىڭ ناحچىۆان قالاسىندا وتكەن تۇركىتىلدەس مەملەكەتتەر باسشىلارىنىڭ IX سامميتىندە ناحچىۆان دەكلاراتسياسىنا قول قويىلدى. وسىلايشا، قازاقستاننىڭ تۇڭعىش پرەزيدەنتى نۇرسۇلتان نازاربايەۆتىڭ تۇركى كەڭەسىن قۇرۋ يدەياسى ىسكە اسقان ەدى.

اۆتور: ايان بەكەن ۇلى