قازاقپارات كۇنتىزبەسى: 26- اقپان

ەستە قالار وقيعالار

1926-جىلى باكۋ قالاسىندا بۇكىلوداقتىق تۇركولوگيا سەزى ءوتتى. وعان تۇركى حالىقتارىنىڭ وكىلدەرى، ك س ر و عىلىم اكادەمياسىنىڭ، شىعىس تانۋ عىلىمي قاۋىمداستىعىنىڭ، ۋكراينا اكادەمياسىنىڭ، زاكاۆكازە شىعىستانۋ قاۋىمداستىعىنىڭ ماماندارى، شەتەلدىك دەلەگاتتار، سونىڭ ىشىندە تۇركيا جانە گەرمانيادان كەلگەن عالىمدار قاتىستى.

سەزدە ازەربايجاننىڭ لاتىن گرافيكاسىنا كوشۋ تاجىريبەسىنىڭ نەگىزىندە وداقتىڭ باسقا رەسپۋبليكالارى مەن وبلىستارىندا تۇراتىن حالىقتاردىڭ ءالىپبيىن لاتىن جازۋىنا كوشىرۋ ۇسىنىلدى. ول ءۇشىن جاڭا تۇركى ءالىپبيىنىڭ بۇكىلوداقتىق ورتالىق كوميتەتى قۇرىلاتىن بولدى. وسىلايشا، اراب جازۋىن قولدانىپ كەلگەن تۇركى حالىقتارىنىڭ جازۋىن لاتىن گرافيكاسىنا كوشىرۋ قوزعالىسى باستالدى.

1993 -جىلى ەل شەكاراسىنىڭ بۇتىندىگىن ناقتىلايتىن «قازاقستان رەسپۋبليكاسىنىڭ مەملەكەتتىڭ شەكاراسى تۋرالى» زاڭ كۇشىنە ەندى.

1999 -جىلى قازاقستان، بەلارۋس، قىرعىزستان، تاجىكستان جانە رەسەي كەدەندىك وداق جانە ءبىرىڭعاي ەكونوميكالىق كەڭىستىك تۋرالى كەلىسىمگە قول قويدى.

2005 -جىلى سولتۇستىك قازاقستان وبلىسى پەتروپاۆل قالاسىندا شوقان ءۋاليحانوۆ پەن فەدور دوستويەۆسكيگە ارنالعان ەسكەرتكىش تاقتا اشىلدى. بارەلەفتى قازاقستاننىڭ ەڭبەك سىڭىرگەن ساۋلەتشىسى ازات بويارلين جاسادى. بارەلەف استانادا «ونەر» ج ش س- دە جاسالدى. بيىكتىگى - 1,5 مەتر، ال ەنى - 2,5 مەتر. بارەلەفتىڭ مۇسىندىك بولىگى سالماعى 500 كەلى قولادان، ال ماتىندىك بولىگى سالماعى 400 كەلى گرانيتتەن جاسالعان.

2011 -جىلى ق ر ۇلتتىق بانكى «ۇلى كوشباسشىلار» سەرياسىمەن 100 تەڭگەلىك «تۇمار» كۇمىس مونەتالارى مەن «جويىلىپ بارا جاتقان جانۋارلار» سەرياسىمەن 100 تەڭگەلىك گاۋھار تاستارى بار «قاراقال» مونەتالارىن شىعاردى.

2014-جىلى نيۋ-يوركتە ب ۇ ۇ جانىنداعى قازاقستان مەن كيريباتيدىڭ تۇراقتى وكىلدەرى قايرات ءابدىراحمانوۆ پەن ماكۋريتا باارو ەكى مەملەكەت اراسىندا ديپلوماتيالىق قاتىناستار ورناتۋ تۋرالى بىرلەسكەن كومميۋنيكەگە قول قويدى. كيريباتي رەسپۋبليكاسى - ميكرونەزيا مەن پولينەزيادا ورنالاسقان تىنىق مۇحيتتىق مەملەكەت.

2014 -جىلى ل. گۋميليەۆ اتىنداعى ەۋرازيا ۇلتتىق ۋنيۆەرسيتەتى الەمدەگى ۇزدىك 50 ج و و قاتارىنا ەندى. جالپى «QS Top 50 under 50» رەيتينگىنىڭ تىزىمىندە گونكونگ، سينگاپۋر، وڭتۇستىك كورەيا، مالايزيا، ا ق ش، يسپانيا جانە ت. ب ەلدەردىڭ ج و و- لارى بار.

2015 -جىلى قازاقستان رەسپۋبليكاسى كونستيتۋتسياسىنىڭ ۇستەمدىگىن ساقتاۋعا، ازاماتتاردىڭ كونستيتۋتسيالىق قۇقىقتارىن قورعاۋعا ۇلەس قوسقان ق ر جانە شەتەل ازاماتتارىن ىنتالاندىرۋ ماقساتىندا، سونداي-اق قازاقستان رەسپۋبليكاسى كونستيتۋتسياسىنىڭ 20 جىلدىعىن تويلاۋ اياسىندا «قازاقستان كونستيتۋتسياسىنا 20 جىل» مەرەيتويلىق مەدالى بەكىتىلدى.

2017 -جىلى جاپونيانىڭ ساپپورو قالاسىندا Ⅷ قىسقى ازيا وريىندارى اياقتالدى. قازاقستان قۇراماسى 32 مەدالمەن (9 التىن، 11 كۇمىس، 12 قولا) جالپى ەسەپتە ءتورتىنشى ورىن الدى.

2018 -جىلى «شىعىس قازاقستاننىڭ اڭىز-اڭگىمەلەرى» كىتابى شىقتى. كىتاپ - وبلىستىڭ 15 كيەلى مەكەنى تۋرالى ۇرپاقتان-ۇرپاققا مۇرا بولىپ وتىرعان اڭىز-اڭگىمەلەردىڭ انتولوگياسى. ونىڭ اۆتورلارى: الىبەك قاڭتاربايەۆ، مارينا يۋرچەنكو، كۇلىماي سەمبايەۆا.

2019 -جىلى قازاقستان ۇيىمداستىرعان ب ۇ ۇ- نىڭ قارۋلى قاقتىعىستارعا قاتىستىرىلعان بالالاردى قايتا ينتەگراتسيالاۋ جونىندەگى دوستارى توبىنىڭ ءبىرىنشى وتىرىسى ءوتتى. قازاقستان، مالتا جانە فرانسيا بىرلەسىپ باسقاراتىن بالالاردى رەينتەگراتسيالاۋ جونىندەگى ب ۇ ۇ دوستارى توبى 2018 -جىلدىڭ قىركۇيەگىندە ب ۇ ۇ- دا قۇرىلعان رەينتەگراتسيا بويىنشا جاھاندىق كواليتسيانىڭ قۇرامداس بولىگى بولىپ تابىلادى.

كواليتسيانىڭ تۇپكى ماقساتى - قارۋلى قاقتىعىستاردان زارداپ شەككەن بالالاردى، ونىڭ ىشىندە تەروريستىك ۇيىمدارمەن جالدانعان بۇرىنعى اسكەر بالالاردى، ادەتتەگى ومىرگە قايتارۋدىڭ جاڭا، ءتيىمدى ادىستەرىن ازىرلەۋ.