تاۋەلسىزدىكتىڭ 30 جىلدىعى: ەلوردادان باستالعان مارافون ورالدا مارەگە جەتتى

ەلوردادان 26- قاراشا كۇنى باستالعان مارافونعا قاتىسقان 15 تاجىريبەلى جەلاياق كوكشەتاۋ - پەتروپاۆل - قوستاناي - اقتوبە ارقىلى جالپى ۇزىندىعى 2021 شاقىرىمدى سەگىز كۇندە جۇگىرىپ ءوتتى.

مارافوننىڭ اياقتالۋىنا ارنالعان سالتاناتتى راسىمگە قاتىسقان ب ق و اكىمىنىڭ ورىنباسارى باقىتجان نارىمبەتوۆ ءوڭىر باسشىسى مەن اق جايىق جۇرتشىلىعى اتىنان قاتىسۋشىلارعا ريزاشىلىعىن جەتكىزدى.

«بۇگىن - ورالدىقتار ءۇشىن ەرەكشە كۇن. 15 ۋلترامارافونشى كەشە ءبىزدىڭ وبلىس اۋماعىنا كىرىپ، جىمپيتى اۋىلىنان، مىنە، ورالعا دەيىن جەتىپ وتىر. 2021 شاقىرىم جۇگىرىپ ءوتۋ، بىلاي قاراعاندا، قيال عاجايىپ اڭگىمە سەكىلدى. مىنە، وسىنى جەلاياقتارىمىز شىنايى ومىرگە اينالدىرا ءبىلدى. ەڭ باستىسى، ەلىمىز امان، جۇرتىمىز تىنىش بولسىن. تاۋەلسىزدىگىمىز تۇعىرلى بولسىن!»، دەدى ب. نارىمبەتوۆ.

ايتا كەتەيىك، اتالمىش مارافوندى «استانا جەلاياعى» مارافونشىلار كلۋبى» ق ب «قازاقستان قۇرىلىسشىلار وداعى» رەسپۋبليكالىق زاڭدى تۇلعالار بىرلەستىگىمەن بىرىگىپ ۇيىمداستىردى.

مارافوننىڭ 469 شاقىرىمعا سوزىلعان ەڭ ۇزاق بولىگى قوستاناي قالاسى مەن اقتوبە وبلىسى ايتەكە ءبي اۋدانى تەمىربەك جۇرگەنوۆ اۋىلى اراسىندا بولدى. ال 148 شاقىرىمدىق ەڭ قىسقا قاشىقتىق ب ق و- نىڭ سىرىم اۋدانى ورتالىعى جىمپيتى اۋىلى مەن ورال قالاسى ارالىعى ەدى.

وسىلايشا مارافونشىلار ۇلى مارتەبەلى تاۋەلسىزدىكتىڭ 30 جىلدىعى اياسىندا وتانشىلدىق سەزىمدى بايىتۋ، سالاۋاتتى ءومىر سالتىن ورنىقتىرۋ باعىتىنداعى ءوز ماقساتىنا جەتتى.