كولىك ساتىپ العانداردىڭ 35 پايىزى عانا ۋتيليزاتسيالىق الىم تولەگەن - ۆيتسە-مينيستر

None
None
نۇر-سۇلتان. قازاقپارات - ق ر يندۋستريا جانە ينفراقۇرىلىمدىق دامۋ ۆيتسە-ءمينيسترى مارات قارابايەۆ «حابار» تەلەارناسىنداعى «بولشايا نەدەليا» باعدارلاماسىندا ۋتيليزاتسيالىق الىم تەتىگىنىڭ ماڭىزى تۋرالى پىكىر ءبىلدىردى، دەپ حابارلايدى قازاقپارات ءتىلشىسى.

«اۋەلى جۇرتقا «و ك م وپەراتورى» ج ش س بۇگىنگە دەيىن قالاي جۇمىس ىستەپ كەلگەنىن ءتۇسىندىرىپ كورەيىك. قوعام ىشىندە ۋتيليزاتسيالىق الىم ارقىلى اۆتوموبيل ونەركاسىبى قولداۋ كورىپ وتىر دەگەن تۇسىنىك قالىپتاسىپ العان. ۋتيليزاتسيالىق الىم جيناۋ تەتىگى مىناداي جولمەن جۇمىس ىستەيدى. اۆتوموبيل يمپورتتاۋشى دا، وتاندىق ءوندىرۋشى دە بىردەي ۋتيليزاتسيالىق الىم تولەيدى. ءبىراق وتاندىق ءوندىرۋشى و ك م- گە تولەگەن الىمىن سول ساتتە-اق قايتارىپ الادى. سوندا يمپورتتاۋشى ۋتيليزاتسيالىق الىمدى تولەيدى، ال وتاندىق ءوندىرۋشى شىعارعان كولىك ىشكى نارىقتا ۋتيليزاتسيالىق الىمسىز ساتىلادى. سونىڭ ەسەبىنەن وتاندىق اۆتوموبيلدىڭ باعاسىندا ۋتيليزاتسيالىق الىمنىڭ قۇنى بولمايدى»، - دەگەن ءمينيستردىڭ ورىنباسارى سوزىنە ناقتى ساندى دالەل ەتىپ كەلتىردى.

«قازاقستاندا ساتىپ الىنىپ جاتقان اۆتو كولىكتىڭ بارىنە ۋتيليزاتسيالىق الىم سالىنادى دەگەن شىندىققا جاناسپايدى. 2021-جىلى ىشكى نارىقتا 118 مىڭ اۆتوموبيل ساتىلعان بولسا، ونىڭ الدىنداعى جىلى 97 مىڭ كولىك ساتىلسا، سونىڭ 65 پايىزى وتاندىق اۆتووندىرىس بولعان. ياعني ازاماتتارىمىزدىڭ باسىم بولىگى ۋتيليزاتسيالىق الىمسىز كولىك ساتىپ العان. ايتپاقشى، بىزدەگى ۋتيليزاتسيالىق الىم تەتىگى رەسەي فەدەراتسياسى مەن بەلارۋس رەسپۋبليكاسىنداعى تەتىك سياقتى. وزبەكستان رەسپۋبليكاسىندا دا وسىنداي تەتىكتىڭ بالاماسى بار. ياعني وتاندىق وندىرىسكە ۋتيليزاتسيالىق الىم سول ساتتە-اق قايتارىپ بەرىلەدى»، - دەگەن ءۋاج ايتتى ول.

ۆيتسە-ءمينيستردىڭ ويىنشا، وتاندىق اۆتوموبيل ونەركاسىبى باسەكەگە قابىلەتتى برەندتەردىڭ ءبارىن شىعارىپ وتىر.

«شىنىمەن دە ازاماتتاردىڭ 65 پايىزى كولىكتى ۋتيليزاتسيالىق الىمسىز ساتىپ الدى. قالعان 35 پايىزى يمپورتتىق تەحنيكا ساتىپ اكەلگەن. قازىر وتاندىق اۆتووندىرىستە الەمدىك برەندتەردىڭ بارلىق ۇلگىسى بار. KIA دا بار، Hyundai دا بار ، LADA، Chevrolet دە بار. سوندا BMV مەن Mersedes قانا قالىپ وتىر. بۇل ەندى «پرەميۋم كلاسس». سوندا 35 پايىزدىڭ قالعانى «پرەميۋم كلاستىڭ» كولىكتەرى. ولاردىڭ باعاسى 20 ميلليون تەڭگەدەن باستالادى. مۇنداي كولىكتى تىزگىندەگىسى كەلەتىندەر ۋتيليزاتسيالىق الىم تولەمەيمىن دەسە، ءوندىرىسىن تۇتاس وسىندا جولعا قويۋ كەرەك. سوندا عانا ۋتيليزاتسيالىق الىمسىز ساتىپ الۋعا بولادى»، - دەدى مارات قارابايەۆ.

سوڭعى جاڭالىقتار