جاپونيادا 3 ءتۇرلى مەكتەپ بار

بالا باستاۋىش سىنىپقا 7 جاسىندا بارادى. باستاۋىش سىنىپتى 6 جىل، قالعان جوعارعى مەكتەپتەردىڭ ءارقايسىسىن 3 جىلدان وقيدى. وسىلايشا قازاقستانداعىداي 11 سىنىپ ەمەس، بارلىعى 12 سىنىپ وقيدى. جانە بىزدەگىدەي ءبىلىمدى ءبىر مەكتەپتىڭ قابىرعاسىندا المايدى. ءار بۋىنعا وتكەن سايىن اۋىستىرىپ وتىرادى. كەيدە ورتا جانە جوعارعى سىنىپتاردىڭ بىرىگەتىن كەزدەرى بولادى.

تەك باستاۋىش پەن ورتاڭعى مەكتەپتە وقۋ مىندەتتەلەدى. ال جوعارعى مەكتەپتە وقۋ، وقىماۋ ەركى وقۋشىنىڭ وزىندە. العاشقى ەكى مەكتەپ تەگىن بولسا، قالعان جوعارعى مەكتەپكە اقشا تولەۋگە ءماجبۇر. مۇنىمەن قاتار مەكتەپتەر جەرگىلىكتى جانە جەكەمەنشىك بولىپ ەكىگە بولىنەدى. جەكەمەنشىك مەكتەپتەردەگى وقۋ باعاسى وتە قىمبات. باستاۋىش جانە ورتا مەكتەپتە كۇنىنە 3-4 ساباق قانا بولادى. ارنايى مەكتەپ فورمىسى دا جوق.

تومەنگى مەكتەپتەردە كونديتسيونەر ورناتىلماعان. سوڭعى كەزدەرى ءتورت قابىرعاسى جابىق تۇراتىن كابينەتتەردەن باس تارتۋدا. مۇنى وقۋشىلاردىڭ ءبىر- بىرىنە زورلىق كورسەتپەۋى ءۇشىن جاساپ وتىر.

ەندى ورتا جانە جوعارعى مەكتەپتى تالدايىق. ءۇش توقساننان قۇرالعان جاپوندىق وقۋ جىلى ءبىرىنشى ساۋىردەن باستالادى. العاشقى توقسان ءساۋىر مەن شىلدە ايلارى ارالىعىن قامتيدى. سوڭىندا تەستىلەر مەن ەمتيحاندار بولىپ، ارتىنشا جازعى دەمالىسقا شىعادى. ەكىنشى توقسان قىركۇيەكتىڭ بىرىنەن باستالىپ، جەلتوقساننىڭ ورتاسىنا دەيىن سوزىلادى. سوڭىندا تەستىلەر مەن ەكزامەندەر بولادى. ءۇشىنشى توقسان قاڭتار مەن ناۋرىز ايلارىنىڭ ارالىعىن قامتيدى.

ساباق ساعات 8:45 تە باستالادى. كۇنىنە 6-7 ساباق بولادى. جەتىنشى ساباق ۇلگەرىمى ناشار، قوسىمشا وقىعىسى كەلەتىندەر ءۇشىن ارنالعان. ءار ساباق 50 مينۋتقا سوزىلادى. ساباق اراسىندا 10 مينۋتتىق ءۇزىلىس بار. ساعات 12:35 پەن 13:20 ارالىعىندا ۇلكەن قوڭىراۋعا شىعادى. وسىلايشا ساباق 16:00 دە اياقتالىپ، وقۋشىلار قىزىققان ۇيىرمەسىنە بارادى. ۇيىرمەگە بارۋ مىندەتتەلمەيدى.

مەكتەپتەردىڭ بايلىعىن سپورتتىق، كوركەمدىك سىندى ۇيىرمەلەردىڭ كوپ بولۋىنان بايقاۋعا بولادى. ءدال قازىر تەننيس، ءجۇزۋ، بەيسبول، گولف، كەندو، كەرلينگ سىندى ونشاقتى ءتۇرى بار. بۇدان وزگە جەكە باسسەينى، فۋتبول الاڭى، گيمناستيكالىق جاتتىعۋلار جاسايتىن زالى جانە گولف ويناۋعا ارنالعان بولمەسى بار.

ءتورت قاباتتى سپورتتىق كلۋب شەشىنەتىن ورىن، جۋىناتىن بولمە، كيىم ساقتايتىن شكاف سىندىلارمەن جابدىقتالعان. مەكتەپ دەمالىس ۋاقىتىندا دا وقۋشىلارعا قامقورلىق تانىتىپ، شەتەلگە ساياحاتتاۋعا مۇمكىندىك بەرەدى. ساياحاتتىڭ قانداي بولاتىندىعى سىنىپ وقۋشىلارىنىڭ جاسىنا بايلانىستى. مىسالى، شىلدە ايىندا ورتا مەكتەپتىڭ العاشقى بۋىنى ناگانوعا بارىپ رينكان جەرگىلىكتى مەكتەبىنىڭ وقۋشىلارىمەن ۋاقىت وتكىزەدى. ولار تەك دەمالىپ قانا قويماي، سەبەت توقىپ، جەلدەتكىش جاساپ ۇيرەنەدى.

ال ورتا مەكتەپتىڭ ەكىنشى سىنىپ وقۋشىلارى وزەن بويىمەن جۇزەدى. اتالعان مەكتەپتىڭ ءۇشىنشى سىنىپ وقۋشىلارى كيوتوعا، نارۋعا، جاڭا زەلاندياعا بارىپ، اعىلشىن ءتىلىن جاقسىلاپ مەڭگەرۋگە مۇمكىندىك الادى.

ءبىرىنشى قىركۇيەك كۇنى قابىرعاعا ەكسكۋرسياعا بارىپ كەلگەن وقۋشىلاردىڭ جاساعان گازەتتەرىن ىلەدى. ول گازەتتەر ارقىلى وقۋشىلار دەمالىستان العان اسەرلەرىن جەتكىزەدى. بۇدان وزگە قالاۋشىلار قىركۇيەكتە وتەتىن فەستيۆالعا قاتىسىپ، ءبىلىم ورداسىمەن جاقىنىراق تانىسا الادى. ەلىمىزدەگى اشىق ەسىكتەر كۇنىنە ۇقساس.

ال ءسىز قازاقستاندىق مەكتەپتەردىڭ دە ۇشكە بولىنگەنىن قالايسىز با؟ جاپوندىق مەكتەپتەردىڭ جازعى دەمالىس كەزىندە ساياحات ۇيىمداستىرۋلارى قانشالىقتى ءتيىمدى؟

massaget.kz