ءۇندىستانداعى وقىس وقيعادان 43 ادام مەرت بولدى

پوليتسيانىڭ مالىمەتىنشە، جاراقات العان جانە كۇيىك شالعانداردىڭ سانى 50 دەن اسادى.

وقيعا ورنىنا ءورت ءسوندىرۋ جانە قۇتقارۋ قىزمەتتەرىنىڭ 30 دان استام ماشيناسى جۇمىلدىرىلدى.

India Today TV حابارلاۋىنشا، ءورت سوندىرۋشىلەرگە وپەراتسيا باستالار الدىندا ءتىلسىز جاۋدىڭ تۇزاعىندا قالىپ قويعان ادامدار تۋرالى ايتىلماعان. بۇل، ادامداردى قۇتقارۋ جۇمىسىنىڭ كەشۋىلدەۋىنە سەبەپ بولىپ، قۇرباندار سانى ارتقان.

پوليتسيا ءورت شىققان كەزدە فابريكادا 59 ادامنىڭ بولعانىن مالىمدەدى. جالىن تۇرعىن ايماقتا ورنالاسقان ءتورت قاباتتى عيماراتتىڭ ەكىنشى قاباتىندا تۇتانعان.

اپات ورنىنا جينالعان ادامدار كوپ بولدى، ولاردىڭ باسىم بولىگى قازا تاپقاندار مەن جاراقات العانداردىڭ تۋىستارى.

ءۇندىستان پرەمەر-ءمينيسترى نارەندرا مودي فابريكاداعى وقيعانى «جان تۇرشىگەرلىك ءورت» دەپ اتادى.

«جاقىندارىن جوعالتقانداردىڭ قايعىسىنا ورتاقپىن. زارداپ شەككەندەردىڭ تەزىرەك ساۋىعىپ كەتۋىن تىلەيمىن. بيلىك وقيعا ورنىندا مۇمكىن بولعان بارلىق كومەكتى كورسەتىپ جاتىر»، - دەپ حابارلادى ول.

پوليتسيا كاسىپورىننىڭ يەسىنە ىزدەۋ سالدى.

جەرگىلىكتى ورگاندار اتالعان فاكتى بويىنشا تەكسەرۋدى باستادى. ايتا كەتەيىك، بۇل اپات ءۇندىستان استاناسىندا بولعان ەڭ ۇلكەن جانە جان تۇرشىگەرلىك ورتتەردىڭ ءبىرى.

اۆتور: راۋشان قوڭىربايەۆا