ساتپايەۆتا 5 جاسار قىزدى زورلاعان كۇدىكتىنى ءوز بەتىنشە جازالاماق بولعان 55 ادامعا ۇكىم شىقتى

None
None
قاراعاندى. قازاقپارات - قاراعاندىدا سوت ساتپايەۆ قالاسىندا ورىن العان جاپپاي تارتىپسىزدىككە قاتىسۋشىلارعا ۇكىم شىعاردى، دەپ حابارلايدى قازاقپارات ءتىلشىسى.

اتالعان ءىس بويىنشا بارلىعى 55 ادام سوت الدىندا جاۋاپ بەرىپ جاتىر. ولار «تارتىپسىزدىك ۇيىمداستىرۋ جانە قاتىسۋ» جانە «بيلىك وكىلىنە قاتىستى زورلىق- زومبىلىق قولدانۋ» باپتارى بويىنشا ايىپتالدى. ءىس بويىنشا 4 ادام تارتىپسىزدىكتى ۇيىمداستىرۋشى دەپ تانىلدى.

45 سوتتالۋشى قاماۋدا، ال 10 ادام ءۇي قاماۋىندا. سوتتالۋشىلار پروتسەسسۋالدىق كەلىسىم جاساستى. قاراعاندى وبلىسى كامەلەتكە تولماعاندار ءىسى جونىندەگى مامانداندىرىلعان اۋدانارالىق سوتىنىڭ سۋدياسى كەنجەباي ىسقاقبايەۆ بۇگىن سوت ۇكىمىن جاريا ەتتى.

ۇكىمگە سايكەس، 9 سوتتالۋشىعا 3 جىلعا باس بوستاندىعىنان ايىرۋ جازاسى تاعايىندالدى، ونى ولار ورتاشا جانە توتەنشە قاۋىپسىز ق ا ج مەكەمەسىندە وتەيدى. سوت 44 سوتتالۋشىنى ءتورت جىلعا شارتتى تۇردە باس بوستاندىعىنان ايىردى. تاعى ەكەۋىن شارتتى تۇردە ءبىر جارىم جىلعا سوتتادى. بەلگىلى بولعانداي، سوتتالعاندار جەرگىلىكتى پوليتسيا ءبولىمى مەن پەدوفيلدىڭ كورشىلەرىنە كەلگەن ماتەريالدىق زالالدى وتەگەن. ءتارتىپ ساقشىلارىنىڭ اۆتوكولىكتەرىنە كەلتىرىلگەن زالال 26 ميلليون تەڭگەنى قۇرادى.

ەستەرىڭىزگە سالا كەتەيىك، وتكەن جىلدىڭ 23-شىلدەسىندە ساتبايەۆ قالاسىندا 5 جاسار بالا جوعالىپ كەتكەن بولاتىن. قىز بالا 62 جاستاعى كۇدىكتىنىڭ پاتەرىنەن تابىلدى. بالانىڭ ۇرلانعانى جايلى جاڭالىقتى ەستىگەن ونداعان قالا تۇرعىنى كۇدىكتىنىڭ ۇيىنە بارىپ، ونى ءوز بەتىنشە جازالاماق بولعان. سالدارىنان قالادا جاپپاي تارتىپسىزدىكتەر باستالدى.

كۇدىكتىگە قاتىستى جاس بالانى ۇرلاۋ جانە زورلاۋ فاكتىسى بويىنشا سوتقا دەيىنگى تەرگەۋ باستالدى. ەر ادام ۇستالدى، كەيىن ونى قاراعاندى تەرگەۋ يزولياتورىنىڭ كامەراسىنا قاماعان. الايدا بىرنەشە كۇننەن سوڭ ول ءوز وزىنە قول جۇمساعان بولاتىن.


اۆتور: اگاتا مۋحامەدجانوۆا

سوڭعى جاڭالىقتار