گەرمانياداعى تابيعي اپات: كومپانيالاردىڭ شىعىنى 500 ميلليون ەۋرودان استى

ساۋدا- ونەركاسىپ پالاتاسى (IHK) مەن قولونەر (HwK) پالاتاسىنىڭ دەرەكتەرىنە قاراعاندا، 800-گە جۋىق كاسىپورىن - IHK مۇشەلەرى، سونداي-اق HwK قۇرامىنا كىرەتىن 800 كومپانيا تابيعي اپاتتان زارداپ شەككەن. ولاردىڭ 71 پايىزى- شاعىن بيزنەس. سونىمەن بىرگە، قوناق ءۇي بيزنەسىنىڭ وكىلدەرى دە قوماقتى شىعىنعا ۇشىراپ وتىر.

اگەنتتىكتىڭ حابارلاۋىنشا، شامامەن 560 ميلليون ەۋرو كولەمىندەگى شىعىننىڭ نەگىزگى بولىگى قيراعان عيماراتتاردىڭ ەنشىسىندە. بۇلاردا جابدىقتار، قۇرالدار مەن تاۋارلار بۇلىنگەن.

«ءوڭىر ەكونوميكاسى نەگىزىنەن تۋريزمگە بايلانىستى»، - دەيدى IHK باسقارۋشى ديرەكتورى ارنە رەسسەل.

«الدىمەن كوروناۆيرۋس پاندەمياسى سالدارىنان كاسىپورىنداردىڭ جۇمىسى توقتادى، ەندى تابيعي اپاتتى باستان كەشىپ وتىرمىز. بۇل سۋ تاسقىنى ەكونوميكاعا، اسىرەسە ار وزەنى بويىنداعى ساۋدا جاساۋشىلارعا، قوناقۇيلەرگە جانە رەستوراتورلارعا ۇلكەن زيان كەلتىردى»، - دەپ قوستى ول. باسقارۋشى ديرەكتوردىڭ اتاپ وتۋىنشە، زارداپ شەككەن كومپانيالارعا 5 مىڭ ەۋرو كولەمىندە شۇعىل كومەك كورسەتۋدىڭ ورنى ەرەكشە بولىپ وتىر.

ايتا كەتەر بولساق، 12-شىلدەدەن باستاپ گەرمانيانىڭ باتىسى مەن وڭتۇستىك- باتىسىندا نوسەر جاڭبىر سالدارىنان جويقىن سۋ تاسقىنى بولدى. رەين-احر مەن موزەل، سونداي-اق ساۋەر، پريۋم، نيمس، كيل جانە ەرفت وزەندەرى ارناسىنان استى. تابيعي اپات سالدارىنان 180 گە جۋىق ادام كوز جۇمدى.