جەرلەۋگە اپارا جاتىپ بالادان تەزىرەك قۇتىلۋدى ويلاعان - 5 جاسار بالانىڭ دەنەسى قوقىسقا قايدان كەلگەن

None
None
تالدىقورعان. قازاقپارات - الماتى وبلىسىندا بەس جاسار بالانىڭ ءولى دەنەسى قوقىستا قالاي پايدا بولعانى انىقتالدى. قازىر قايتىس بولعان بالانىڭ 20 جاستاعى اناسى مەن اناسىنىڭ تۋعان 2001 -جىلعى اعاسى پوليتسياعا جاۋاپ بەرىپ جاتىر، دەپ حابارلايدى قازاقپارات ءتىلشىسى.

قايتىس بولعان بالانىڭ ناعاشى اعاسى كىشكەنتايدى مولاعا جەرلەمەك بولعان. ولاردىڭ اناسى دا قايتىس بولعان ەكەن. سوزىنشە، سول اناسى جەرلەنگەن زيراتقا بارا جاتىپ، جاردى كورىپ بالانىڭ مۇردەسىن سول جەرگە تاستاپ كەتكەن.

«اعاسى ءمايىتتى قوقىس الاڭىنا تاستاپ كەتكەن سەبەبىن ءتۇسىندىردى. ايتۋىنشا، دەنەنى مولاعا اپارا جاتقان. ءتۇن ۋاقىتى بولعان. ءتۇن بولعان سوڭ ءارى قاراي جۇرۋگە قورىقتىم دەيدى. ىشىندە بىرەۋ كورىپ قويا ما دەگەن ۇرەي بولعانىن ايتادى. سول سەبەپتى بالادان تەزىرەك قۇتىلۋدى ويلاعان.


«ۇلكەن جاردى كوردىم، سول جەرگە تاستاپ كەتتىم» دەيدى. سوزىنە سەنسەك، بالا ايى- كۇنى جەتپەي، تولىق جەتىلمەي تۋعان. سول وقيعانىڭ الدىندا كىشكەنتاي ءۇش كۇن بويى اۋىرعان. ءبىراق اناسى دا، اعاسى دا ەشقايدا حابارلاماعان. ءۇش كۇن اۋىرسا دا، بالانىڭ اۋىرعانىن ەشكىمگە ايتپاي، بالانىڭ قايتىس بولعانىن كۇتىپ جاتقانداي بولعان»، - دەدى سارقان اۋدانى پروكۋرورىنىڭ ورىنباسارى ەدىل قورعانبايەۆ.

اناسىنىڭ سوزىنشە، ول قىزىن ولتىرمەگەن. بالا اۋىرىپ قايتىس بولعان. ءبىراق پوليتسياعا بالاسىنىڭ مۇردەسى قوقىسقا تاستالعانىن بىلمەدىم دەپ جاۋاپ بەرىپتى. ءوزى تۇرمىس قۇرماعان. جاقىندا ەكىنشى بالاسىن بوسانىپتى. بەس ايلىق بالاسى بار 20 جاسار جاس انانىڭ ءوز اتا- اناسى دا مارقۇم بولعان.

ەستەرىڭىزگە سالا كەتەيىك، بۇعان دەيىن الماتى وبلىسى سارقان اۋدانىندا بەس جاسار بالانىڭ ءمايىتى قوقىستان تابىلعانىن حابارلاعان بولاتىنبىز. قۇزىرلى ورگاننىڭ اقپاراتىنا سايكەس، بۇگىن بالانىڭ اناسى انىقتالدى. ول - 2002 -جىلى تۋعان سارقان قالاسىنىڭ تۇرعىنى. بالاسىن 2017 -جىلى ياعني، 15 جاسىندا دۇنيەگە اكەلگەن. تەرگەۋ ءجۇرىپ جاتىر.


الماتى وبلىسىنىڭ سارقان اۋدانىندا بەس جاستاعى قىز بالانىڭ دەنەسىن قوقىستان تاپقان كۋاگەر وقيعانىڭ قالاي بولعانىن ايتتى. باس كيىم كيگەن كىشكەنتاي بالانىڭ باسى قوقىستا جاتقانىن سارقاندىق تۇرعىن ءمادي مۇحامەتقاليەۆتىڭ بالالارى كورىپتى. اكەسى بالالارىنان سۇمدىق جايتتى ەستىپ، دەرەۋ وقيعا ورنىنا بارعان. پوليتسيانى شاقىرتقان.

«وسىدان ەكى كۇن بۇرىن، ياعني 17- مامىر كۇنى تۇسكى ساعات 11:00 شاماسىندا ۇيدە دەمالىپ جاتقانمىن. ۇلىم كەلىپ «اكە، اكە! انا جەردە نارەستەنىڭ سۇيەگى جاتىر. كورىڭىزشى، كورىڭىزشى؟» دەيدى. كەلسەم، تۋرا وسى قوقىستىڭ جانىندا بالانىڭ باس سۇيەگى جاتىر. ەتى اعىپ كەتكەن. دەنەسى تومەندە جاتىر ەكەن. باسى ءبىر بولەك، دەنەسى ءبىر بولەك جاتتى»، - دەدى ءمادي مۇحامەتقاليەۆ قازاقپارات تىلشىسىنە بەرگەن سۇحباتىندا.


ءمادي مۇحامەتقاليەۆ وقيعانىڭ وتكەنىنە ەكى كۇن بولسا دا ءالى ءوز- وزىنە كەلە الماي جۇرگەنىن ايتادى.

«جانۋار دا ءوز بالاسىن قورعايدى، مىناۋ ەندى سۇمدىق قوي. بالانىڭ ءولى دەنەسى قوقىستا جاتىر. ءالى دۇرىستاپ تاماق ىشە الماي ءجۇرمىن. ءوزىم دە بالا ءوسىرىپ وتىرمىن. بالا كيىمىمەن جاتتى»، - دەدى ءمادي مۇحامەتقاليەۆ.

سوڭعى جاڭالىقتار