كوكشەتاۋدا ەكى جاسار قىز بالا 7-قاباتتان قۇلاپ مەرت بولدى

ۆەدومستۆونىڭ مالىمەتىنشە، قايعىلى جاعداي مامىردىڭ 14- كۇنى كەشكى ساعات 18:55 شاماسىندا بولعان. بۇل تۋرالى كوكشەتاۋ قالالىق پوليتسيا باسقارماسىنىڭ كەزەكشى بولىمىنە جەدەل جاردەم فەلدشەرى حابارلاپ ايتقان.

«ابىلاي حان كوشەسى، 15 -مەكەنجايىندا ورنالاسقان 9 قاباتتى تۇرعىن ءۇيدىڭ جەتىنشى قاباتىنان قىز بالا قۇلاپ كەتتى. الداعى ماۋسىم ايىندا ءبۇلدىرشىن 2 جاسقا تولاتىن ەدى»، - دەپ ايتتى قازاقپارات ءتىلشىسىنىڭ ساۋالىنا اقمولا وبلىستىق پوليتسيا دەپارتامەنتى باسپا ءسوز قىزمەتىندەگىلەر.

انىقتالعانداي، ءبۇلدىرشىن پاتەردىڭ اشىق تۇرعان تەرەزەسىنەن ابايسىزدا قۇلاپ كەتكەن. ۆەدومستۆودان اتاپ وتكەندەي، قازىرگى كەزدە وقيعانىڭ ءمان- جايى انىقتالىپ جاتىر. قىلمىستىق كودەكستىڭ 141-بابى 2-بولىگى بويىنشا سوتقا دەيىنگى تەرگەۋ امالدارى جۇرگىزىلۋدە.

اۆتور: اسلان وسپانوۆ