تۇركىستان وبلىسىندا مال ۇرلىعى بويىنشا 7 كۇدىكتى ۇستالدى

None
None
تۇركىستان. قازاقپارات - تۇركىستان وبلىسىندا جابىرلەنۋشىلەرگە 10 ميلليون تەڭگەدەن استام شىعىن كەلتىرگەن مال ۇرىلارى ۇستالدى، دەپ حابارلايدى قازاقپارات ءتىلشىسى.

كۇدىكتىلەر قىلمىس جاسار الدىندا ءوز رولدەرىن جوسپارلاپ، ءبولىپ العان. ماسەلەن، باستى كۇدىكتى جايىلىمدا قاراۋسىز جۇرگەن جىلقى، سيىرلاردى بايقاعان بويدا، ءوزىنىڭ ۇساق مالدارىنا قوسىپ، ايداپ اكەتىپ وتىرعان. ال، ەكى سىبايلاسىنا ۇرلانعان ءتورت تۇلىكتى ارزانعا ساتۋ مىندەتتەلىپتى.

«كەلەس اۋداندىق پوليتسيا بولىمىنە ارىزدانعان جەرگىلىكتى تۇرعىن 3 سيىرىنىڭ جايىلىمنان ۇرلانعانىن كورسەتكەن. اتالعان ءىس نەگىزىندە جەدەل- تەرگەۋ توبىن قۇردىق. كۇدىكتى رەتىندە جەرگىلىكتى تۇرعىننىڭ جەكە باسى انىقتالىپ، ونى تۇرعىلىقتى مەكەنجايىنان ۇستادىق. تەرگەۋ كەزىندە ول مال ۇرلىعىمەن اينالىسقانىن مويىنداپ، قىلمىستى ۇيىمداستىرۋشى مەن ساتىپ الۋشى سىبايلاستارى بار ەكەنىن ايتتى. سودان كەيىن تاعى 6 كۇدىكتىنى قولعا تۇسىردىك»، - دەدى تۇركىستان وبلىستىق پوليتسيا دەپارتامەنتى باستىعىنىڭ ورىنباسارى قۇرمانبەك ساحوۆ .

كۇدىكتىلەر ولجالارىن «گازەل» ماركالى كولىكپەن تاسىمالداعان. بارلىعى 28 ءۇي جانۋارىن ساتىپ الۋشىلارعا، قاساپشىعا ارزان باعادا وتكىزىپ كەلىپتى. قىلمىستىق توپتان ايعاقتى زات رەتىندە «گازەل» كولىگى، 6 جىلقى مەن 2 سيىر تاركىلەندى. قازىرگى ۋاقىتتا سوتقا دەيىنگى تەرگەۋ امالدارى جۇرگىزىلىپ جاتىر.

ايتا كەتسەك، اتىراۋدا ادام ۇرلاۋ مەن زورلاۋعا قاتىستى قىلمىستى جاسىرعان پوليتسەيلەر سوتتالدى.

اۆتور: قايرات زاينيشيەۆ


سوڭعى جاڭالىقتار