ەلىمىزدەگى 8 ءوڭىردىڭ تۇرعىندارىن گازبەن قامتۋ ءۇشىن 58 جوبا جۇزەگە اسىرىلىپ جاتىر

بۇل تۋرالى بۇگىن ۇكىمەت وتىرىسىندا ق ر ەنەرگەتيكا ءمينيسترى نۇرلان نوعايەۆ ايتتى، دەپ حابارلايدى قازاقپارات ءتىلشىسى.

«سوڭعى 5 جىلدا 1334 شاقىرىم ماگيسترالدىق گاز قۇبىرى جانە 20 مىڭ شاقىرىمنان استام گاز تاراتۋ جەلىسى سالىنعان. ماگيسترالدىق گاز قۇبىرلارى قۇرىلىسىنىڭ ءوسىمى - 7، گاز تاراتۋ جەلىلەرى قۇرىلىسىنىڭ ءوسىمى - 49 پايىزدى قۇرادى. 2015-2020-جىلدار ارالىعىندا رەسپۋبليكالىق بيۋجەت ەسەبىنەن اكىمدىكتەرگە گازداندىرۋ جۇمىسىنا 125 ميلليارد تەڭگە مولشەرىندە نىسانالى ترانسفەرتتەر، ونىڭ ىشىندە سوڭعى 2 جىلدا 76 ميلليارد تەڭگە ءبولىندى»، - دەدى مينيستر.

سونداي-اق ول گازداندىرۋدىڭ كەي جوبالارى ەڭبەك جانە حالىقتى الەۋمەتتىك قورعاۋ مينيسترلىگىنىڭ «جۇمىسپەن قامتۋدىڭ جول كارتاسى» بيۋجەتتىك باعدارلاماسى ەسەبىنەن ىسكە اسىرىلىپ جاتقانىن ايتتى.

«2020-2021-جىلدارى 8 وڭىردە 22,5 ميلليارد تەڭگەگە 58 جوبانى ىسكە اسىرۋ جوسپارلانعان. ونىڭ ىشىندە 51 جوبانى وسى جىلى جانە 7 جوبانى الماتى وبلىسىندا 2021-جىلى اياقتاۋ كوزدەلىپ وتىر»، - دەدى نۇرلان نوعايەۆ.