قىسقى وليمپيادا: قازاقستاندا سپورتتىڭ 8 تۇرىنەن 82 جولداما بار
ناتيجەسىندە قازاقستاندىق اتلەتتەر سپورتتىڭ 8 تۇرىنەن 82 جولداما الدى، دەپ حابارلايدى قازاقپارات.
ق ر ۇلتتىق وليمپيادا كوميتەتىنەن ءمالىم ەتكەندەي، شاڭعى جارىسى بويىنشا قورجىندا 30 جولداما بار. فريستايلشىلار توعىز جولداماعا يە بولعان. سونىڭ ىشىندە موگۋل بويىنشا - 5، اكروباتيكا بويىنشا 4 جولداما بار.
كونكيشىلەر مەن بياتلونشىلار - 12، شورت-ترەكشىلەر 9 جولدامانى قورجىنعا سالدى. تاۋ شاڭعىسى مەن شاڭعىمەن تۇعىردان سەكىرۋ سپورتىنان ەل قۇرامالارى 4 جولدامادان ەنشىلەسە، شاڭعى قوسسايىسىنان وتاندىق سپورتشىلار ەكى ليتسەنزياعا يە بولدى.
بۇگىنگى تاڭدا وليمپيادالىق قۇراما ساپىنا 32 سپورتشى ەندى.
ايتا كەتەرلىگى، بۇل سپورتشىلاردىڭ سوڭعى ءارى ناقتى سانى ەمەس. سەبەبى ۇ و ك كەيبىر سپورت تۇرلەرىنەن حالىقارالىق فەدەراتسيالاردىڭ ليتسەنزيالاردى قايتا ءبولۋ، ۇلەستىرۋ ناتيجەلەرىن كۇتۋدە.
اتاپ ايتقاندا، بياتلون، شاڭعى جارىسى، موگۋل جانە اكروباتيكادان تاعى دا جولدامالار ۇلەستىرىلۋى مۇمكىن.
وليمپيادا ويىندارىنا قاتىساتىن سپورتشىلاردىڭ سوڭعى ءارى ناقتى ءتىزىمى 20- قاڭتاردان كەيىن بەلگىلى بولادى.
بۇگىن، 18- قاڭتار كۇنى مادەنيەت جانە سپورت ءمينيسترى داۋرەن ابايەۆ XXIV قىسقى وليمپيادا ويىندارىنىڭ دايىندىعى جايىندا جيىن وتكىزدى.
مينيستر وليمپيادا ويىندارىندا ۇلتتىق قۇراما الدىندا تۇرعان ءبىرقاتار مىندەتتەرگە توقتالدى.
«ەل ءۇشىن قازىرگى قيىن جاعدايدا، سونىڭ ىشىندە كوروناۆيرۋس ينفەكسياسىنىڭ كوبەيۋى كەزىندە ءبىز سپورتشىلارىمىزعا الداعى وليمپيادادا دوپينگىسىز، جانجالسىز، لايىقتى ونەر كورسەتۋ مىندەتىن قويدىق. ارينە، ءاربىر سپورتشى جەتىستىكتىڭ شىڭى سانالعان وليمپيادا مەدالىنە ۇمتىلادى. ال ءبىز وليمپياداشىلارىمىزدىڭ كەز كەلگەن جەتىستىگىنە قۋانامىز. بۇل ءۇشىن مەملەكەت قولدان كەلگەننىڭ بارلىعىن جاساپ، سپورتشىلاردى دايىنداۋ، ساپالى جاتتىعۋ، وقۋ-جاتتىعۋ جيىندارى جانە ىرىكتەۋ جارىستارىنا قاتىسۋ قارجىلاندىرىلدى»، - دەدى مادەنيەت جانە سپورت ءمينيسترى.
«بۇگىنگى كۇننىڭ باستى مىندەتى - سپورتشىلار مەن جاتتىقتىرۋشىلار دەنساۋلىعى مەن قاۋىپسىزدىگىن ساقتاۋ. ولاردىڭ كوپشىلىگى، ياعني ىرىكتەۋ تۋرنيرلەرىن اياقتاعاندار سوڭعى اپتا بويى جابىق كارانتيندىك ايماقتاردا ورنالاستى. وندا دايىندىقتىڭ سوڭعى كەزەڭى ءجۇرىپ جاتىر. الەمدىك دودالار اياقتالعان سوڭ بەيجىڭگە ۇشپاس بۇرىن سپورتشىلار كارانتيندە ۋاقىت وتكىزەدى»، - دەيدى ۇ و ك باس حاتشىسى اندرەي كريۋكوۆ.
ويىن كەزىندە وليمپيادا اۋىلىنىڭ تۇرعىندارىنان كۇن سايىن پ ت ر- تەست الىنىپ، دەنساۋلىعى تەكسەرىلەدى، جازداعى توكيو وليمپياداسىنىڭ ۇلگىسى بويىنشا قاتىسۋشىلاردىڭ ورنالاسقان جەرى ارنايى تەلەفون قوسىمشاسى ارقىلى باقىلانادى.
قازاقستان قۇراماسى 27- قاڭتار كۇنى «Air Astana» چارتەرلىك رەيسىمەن نۇر-سۇلتاننان الماتى ارقىلى بەيجىڭگە اتتانادى. ايتا كەتەرلىگى، قازاقستان قۇراماسىنىڭ وليمپيادالىق فورماسىنىڭ تانىستىرىلىمى 20- قاڭتارعا جوسپارلانعان.
قىسقى وليمپيادا ويىندارى 4- اقپان كۇنى باستالادى جانە 109 مەدال جيىنتىعى ساراپقا سالىنادى.