بيىل استانادا 8 مەكتەپ سالىنادى

None
None
نۇر-سۇلتان. قازاقپارات - بيىل استانادا 8 مەكتەپ قولدانىسقا بەرىلۋى كەرەك. قالالىق قۇرىلىس باسقارماسىنىڭ باسشىسى ارسەن جاڭعاسقانوۆ ءماسليحات دەپۋتاتتارىنا وسىنداي جوسپارىن ءمالىم ەتتى، دەپ حابارلايدى قازاقپارات ءتىلشىسى.

«بيىل بيۋجەتتىك ينۆەستيتسيالىق جوبا بويىنشا 5 مەكتەپ سالۋدى جوسپارلاپ وتىرمىز. ونىڭ ىشىندە ۇلى دالا كوشەسىندەگى 1200 ورىندىق مەكتەپ بار. بۇعان دەيىن دە بۇل نىساننىڭ «ساقالدى قۇرىلىس» ەكەنىن ايتقانمىن. اقىرى مەردىگەرىن اۋىستىردىق. «ءسات قۇرىلىس» كومپاينياسىمەن كەلىسىم-شارتتى بۇزدىق. قۇرىلىستى «مەيىرم» ج ش س اياقتايدى. قاراساي باتىر-بۇلانتى اۋدانىنداعى مەكتەپتىڭ قۇرىلىسى ءجۇرىپ جاتىر. بيىل اياقتاۋدى جوسپارلاپ وتىرمىز. سونداي-اق، 65№، 44№ جانە 59№ مەكتەپتەردىڭ اۋماعىنداعى قوسىمشا قۇرىلىستار بار. 65№ جانە 44№ مەكتەپ بويىنشا كونكۋرس ءوتىپ جاتىر، اياقتالۋعا جاقىن. اقپان ايىنىڭ ورتاسىنا قاراي مەردىگەرلەر بەلگىلى بولاتىن شىعار. 59№ مەكتەپ بويىنشا ساراپتامادان ءوتىپ جاتىرمىز. مۇندا جەكە قۇرىلىس سالىنىپ كەتكەن. سونىڭ كەسىرىنەن كەشىگىپ جاتىرمىز. بۇگىندە ماسەلە شەشىلدى، نىسان سۇرىلەدى. قازىر بۇل مەكتەپتە 3800 بالا وقىپ جاتىر. جوبالىق قۋاتى بويىنشا 2400 بالاعا ارنالعان»، - دەدى باسقارما باسشىسى.

ونىڭ مالىمەتى بويىنشا، بيىل قالادا مەملەكەت-جەكەمەنشىك ارىپتەستىگى اياسىندا 3 مەكتەپ سالىنىپ ءبىتۋى كەرەك.

«مەملەكەت-جەكەمەنشىك ارىپتەستىگى بويىنشا سالىنىپ جاتقان Zam-Zam مەكتەبىنىڭ (2000 ورىندىق) ىرگەتاسى قۇيىلىپ، قاڭقاسى بوي كوتەردى. بيىل پايدالانۋعا بەرمەكشىمىز. رىسقۇلوۆ- قاسەنوۆ قيىلىسىنداعى نەمەسە EXPO اۋدانىنداعى 2000 ورىندىق مەكتەپتى دە بيىل اياقتاۋ جوسپارلانعان. بۇدان بولەك وماروۆ-مۇحامەدحانوۆ اۋدانىنداعى 2000 ورىندىق مەكتەپتىڭ جوباسىن پىسىقتاپ جاتىرمىز»، - دەدى ارسەن جاڭعاسقانوۆ.


سوڭعى جاڭالىقتار