قوس ازاماتتىقپەن جۇرگەن 90 ادام انىقتالدى

قازاقستان رەسپۋبليكاسىندا قوس ازاماتتىققا جول بەرىلمەيدى، ياعني شەتەل ازاماتى ءبىر مەزگىلدە قازاقستان رەسپۋبليكاسىنىڭ ازاماتى بولا المايدى. ەگەر قازاقستان رەسپۋبليكاسىنىڭ ازاماتى باسقا مەملەكەتتىڭ ازاماتتىعىن الاتىن بولسا، وندا سول كەزدەن باستاپ قازاقستان رەسپۋبليكاسىنىڭ ازاماتتىعى ساقتالمايدى.

- پاۆلودار وبلىسىنىڭ پ د كوشى-قون قىزمەتى باسقارماسى 2020 -جىلدىڭ 10-ايىندا 544 ادامعا قاتىستى قازاقستان رەسپۋبليكاسىنىڭ ازاماتتىعىنان ايىرۋ بويىنشا قۇجاتتاردى رەسىمدەدى، ونىڭ ىشىندە 454 ادام باسقا مەملەكەتتىڭ ازاماتتىعىن العانى تۋرالى ءوز بەتىنشە حابارلادى. بۇدان باسقا 90 ادامنىڭ قوس ازاماتتىقپەن جۇرگەنى انىقتالدى، - دەدى پاۆلودار وبلىسى پ د كوشى-قون قىزمەتى باسقارماسىنىڭ باستىعى ارمان ۋاليەۆ.

باسقا مەملەكەتتىڭ ازاماتتىعى بولا تۇرا، قازاقستان رەسپۋبليكاسىنىڭ قۇجاتتارىن پايدالانعان 34 ازامات انىقتالدى، باسقا مەملەكەتتىڭ ازاماتتىعىن العانى تۋرالى بەلگىلەنگەن مەرزىمدە حابارلاماعانى ءۇشىن 56 قۇقىق بۇزۋشى اكىمشىلىك جاۋاپكەرشىلىككە تارتىلدى.

- قازاقستان پاسپورتىن تاپسىرۋعا شەشىم قابىلداعان ازاماتتاردىڭ نەگىزگى بولىگى رەسەي ازاماتتىعىن الدى. مالىمدەمەلەرىندە ادامدار وزدەرىنىڭ قونىس اۋدارۋىن بالالارىنىڭ رەسەيدە وقۋىمەن نەمەسە قامقورلىقتى قاجەت ەتەتىن قارت اتا-انالارىنىڭ سوندا تۇرۋىمەن تۇسىندىرەدى، - دەپ اتاپ ءوتتى ارمان مۇرات ۇلى.

مىسالى، رەسەي فەدەراتسياسىنىڭ ازاماتتىعىن العان ۋسپەن، شارباقتى جانە جەلەزين اۋداندارىنىڭ بۇرىنعى تۇرعىندارىندا قوس ازاماتتىق فاكتىلەرى انىقتالدى. ۋسپەن اۋدانىنىڭ تۇرعىنى بيىلعى جىلدىڭ قىركۇيەك ايىندا رەسەي فەدەراتسياسىنىڭ ازاماتتىعىن قابىلداپ، رەسەي پاسپورتىن الىپ، زاڭنامادا بەلگىلەنگەن مەرزىمدە باسقا رەسپۋبليكانىڭ ازاماتتىعىن قابىلداعانى تۋرالى حابارلاماي، قازاقستاندىق پاسپورتىن تاپسىرماعان.

ۋسپەن اۋداندىق سوتىنىڭ قاۋلىسىمەن ازامات ق ر اكىمشىلىك قۇقىق بۇزۋشىلىق تۋرالى كودەكسىنىڭ 496-بابى بويىنشا كىنالى دەپ تانىلىپ، وعان 388920 تەڭگە كولەمىندە ايىپپۇل سالىندى. جەلەزين اۋدانىنىڭ تۇرعىنى سوت قاۋلىسىمەن قازاقستان رەسپۋبليكاسىنىڭ ازاماتتىق تۋرالى زاڭناماسىن بۇزعانى ءۇشىن ەلدەن شىعارىلدى. ول 2020 -جىلدىڭ اقپان ايىندا ر ف ازاماتتىعىن الىپ، ءوزىنىڭ قازاقستاندىق پاسپورتىن تاپسىرعان جوق.

ءتارتىپ بۇزۋشى سوتتان ونى ەلدەن شىعارىپ جىبەرۋدى سۇرادى، بۇل شەشىمدى ايىپپۇل تولەۋ ءۇشىن اقشاسىنىڭ، سونداي-اق تۋىستارى مەن مۇلكىنىڭ جوقتىعىمەن تۇسىندىرگەن.