مۇقاعالي ايتقان ەكەن
جۇرت مۇقاعاليدىڭ اقىندىعىمەن قوسا، ونىڭ وتكەن ءومىرى، قورشاعان ورتاسى تۋرالى اڭگىمەلەردى اقىن زامانداستارىنىڭ اۋزىنان دا ەسىتىپ ءجۇر. سونىڭ ءبىر پاراسىن «مۇقاعالي ايتقان ەكەن.. .» دەگەن تاقىرىپپەن نازارلارىڭىزعا ۇسىنامىز.
«قۇرال- سايمان تولىپ كەتىپتى عوي»
مۇقاعالي ماقاتايەۆ ءبىر جولى اقتوبەگە بارادى. وبلىستىق گازەتتە قىزمەت ىستەيتىن اقىن مۇحتار قۇرماناليننىڭ بولمەسىنە كىرسە، ول كىسى جوق ەكەن دە، ءبىراق جاس قىزمەتكەر وتىرسا كەرەك.
- مۇحتار قايدا؟ - دەپ سۇرايدى ودان مۇقاعالي.
- رەداكتور شاقىرىپ ەدى، قازىر كەلىپ قالار، وتىرا تۇرىڭىز.
مۇقاعالي ۇستەلدى ساۋساقتارىمەن شەرتكىلەپ: «مۇحتار دا مۇقا، مۇقاعالي دا مۇقا» ، - دەگەندى قايتالاپ ايتا بەرەدى. الگى جىگىت قاراپ وتىرماي:
- مۇقاڭ كوپ بولعانمەن، مۇحتار بىرەۋ عوي، - دەپتى.
مۇقاعالي وعان جالت قارايدى:
- دۇرىس ايتاسىڭ، بالا، اتىڭ كىم ءوزىڭنىڭ؟
- قۇرال.
وسى كەزدە بولمەگە باسقا ءبىر جىگىت كىرىپ كەلەدى. ول مۇقاعاليدى تانىپ، قول ۇسىنىپ، سالەم بەرەدى.
- ال سەن كىمسىڭ؟ - دەپ سۇرايدى مۇقاعالي.
- بولات تەمىروۆ دەگەن اقىن ءىنىڭىزبىن عوي، - دەيدى جاڭا كەلگەن جىگىت.
سوندا مۇقاعالي:
- وۋ، رەداكسيالارىڭا قۇرال- سايمان، تەمىر- تەرسەك تولىپ كەتىپتى عوي، - دەگەن ەكەن.
***
قاراساز اۋىلىنداعى سەگىز جىلدىق مەكتەپتە جالپى ورتا بىلىممەن عانا مۇعالىم بولىپ جۇرگەن جاس اقىن - مۇقاعالي وكشەباسار اۋىلداس ءىنىسى ەركىن ءىبىتانوۆقا:
- كورەسىڭ، باۋىرىم! مەن بولاشاقتا ەل تانيتىن تاماشا اقىن بولامىن! مەنىڭ قۋاتتى، وتتى ولەڭدەرىم مىنا ەنگەلس اتىنداعى كولحوزدىڭ اتىن ماعان الىپ بەرەدى. اۋىل مەنىڭ اتىممەن اتالادى! ءسال جالقاۋلىعىڭ بولماسا، سەن دە جامان اقىن ەمەسسىڭ... ساعان قايسى اۋىلدىڭ اتىن اپەرسەم ەكەن؟ ! - دەپ ازىلدەگەن ەكەن.
اراشا ءتۇسۋ
ءبىر كۇنى جازۋشىلار وداعىنىڭ عيماراتىنىڭ الدىندا قازاقتىڭ بەلگىلى قالامگەرى سادىقبەك ادامبەكوۆ پەن سانسىزباي سارعاسقايەۆ سوزگە كەلىپ، جاعا ۇستاسىپ قالىپتى. بۇل وقيعاعا كۋا بولعان مۇقاعالي ماقاتايەۆ ەكەۋىن سابىرعا شاقىرىپ، اراشا ءتۇسىپتى. قازاق - سوزگە توقتاعان حالىق. ەكەۋى ساباسىنا تۇسكەن سوڭ:
- سەندەرگە ارناپ ولەڭ شىعارىپ بەرەيىن بە؟ - دەيدى مۇقاعالي ارقالانىپ.
- شىعارساڭ، شىعار، - دەيدى ەكەۋى جارىسا.
سوندا اقيىق اقىن مۇدىرمەستەن بىلايشا ولەڭدەتە جونەلگەن ەكەن:
- سارى ءتىستى، سارى شاشتى سادىقبەكتى،
سانسىزباي سارعاسقايەۆ سالىپ كەتتى.
ۇرامىن دەپ تاعى دا ۇمتىلعاندا،
جولداستارى ۇرعىزباي الىپ كەتتى.
massaget.kz