مەرۋەرت تۇسىپبايەۆا «قيماي سەنى بارامىن» بەينە بايانىن قالاي تۇسىرگەنىن ايتىپ بەردى

بۇل تۋرالى ك ت ك ارناسىنىڭ «باستى رولدە» باعدارلاماسىندا ايتىلدى.

«مەن 1995 -جىلى «قيماي سەنى بارامىن» اتتى بەينەبايانمەن قازاق ەلىنە تانىلعان بولاتىنمىن. ول كەزدە بەينەبايان دەگەن جوقتىڭ قاسى ەدى. اتالعان تۋىندىنى جۇرت جىلى قابىلدادى. سول ۋاقىتان بەرى 12 جىلدىڭ ىشىندە مەن ورىنداعان اندەرىمنىڭ بارلىعى حيت بولدى دەسەم قاتەلەسپەيمىن. بۇل ارتىق ايتقانىم ەمەس. ءدال قازىرگى ۋاقىتتا مەن جاڭا اندەر جازعىزىپ جاتىرمىن. ارينە، بارلىق اندەرىم حيت بولادى دەپ ماقتانىپ ايتا المايمىن. شىعارماشىلىعىمدا بالكىم توقىراۋ بولىپ جاتقان شىعار. قۇدايعا شۇكىر، مەن قازىرگى ۋاقىتتا كينوعا دا ءتۇسىپ جاتىرمىن. ونەر سالاسىندا جيناعان بارلىق تاجىريبەمدى مەن شاكىرتتەرىمە بەرۋگە تىرىسۋدامىن. قالعان ومىرىمە ازىق بولاتىن حيت اندەرىم دە كوپ. سول ەسكى اندەرىمدى كوپ ادام سۇرايدى. ەسكى اندەرىمنىڭ كوپ سۇرانىسقا يە ەكەنىن ماقتانىشپەن ايتا الامىن»، - دەيدى ءانشى.

ءانشىنى جۇرتقا تانىتقان «قيماي سەنى بارامىن» بەينەبايانى اسىعىس تۇسىرىلگەن ەكەن. مەرۋەرت تۇسىپبايەۆا وعان از ۋاقىت ىشىندە دايىندالىپ ۇلگەرگەنىن ايتىپ جاتىر.

«ول ۋاقىتتا تەحنيكانىڭ دامىماعان زامانى بولاتىن. دانيار ەسىمدى ازامات تۇسىرەتىن بولدى. مەن ول كەزدە تەاتردا جۇمىس جاساپ ءجۇردىم. الگى بالا ءبىر كۇنى كەلىپ «مەن ەرتەڭگە كامەرانى الدىم. باسقا كۇنى كامەرا بولمايدى» دەدى. مەندە نە كويلەك، نە تۋفلي جوق. «ويباي، قالاي؟ مەن دايىن ەمەسپىن. كيىمىم دە دايىن ەمەس» دەسەم، «بولدى، ەرتەڭ كامەرانى الساق الدىق. باسقا كۇنگە سىزگە كامەرا جوق» دەپ قىسقا قايىردى. تانىمال ايگۇل اپكەمنەن كويلەك سۇرادىم. ول كىسى مەنەن اياماي ەڭ ادەمى كويلەگىن بەردى. تۋفليدى جۇگىرىپ بارىپ ءبىر جەردەن الدىم. باراحولكادان، باسقا جەردەن بە؟ ناقتى قايدان العانىم ەسىمدە جوق»، - دەيدى ول.

مۇنىمەن قاتار، ءانشى ءوزىنىڭ قانداي انا ەكەنىن ايتىپ بەردى. ەرتە تۇرۋدى ۇناتاتىن تۇسىپبايەۆا بالاسىن ءبىرىنشى ءوزى بارىپ وياتادى ەكەن.