نۇر-سۇلتاندا جول اقىسى قىمباتتاي ما
بۇل تۋرالى بۇگىن «استانا LRT» ج ش س باسقارما ءتوراعاسى بەكمىرزا يگەنبەردينوۆ ايتتى، دەپ حابارلايدى قازاقپارات ءتىلشىسى.
«سارالانعان تاريف ەنگىزىلگەننەن كەيىن تاسىمالداۋشىلاردىڭ تابىسى شامامەن 40 پايىزعا ارتتى. سونىمەن قاتار شتات پەن جالاقىنىڭ ارتۋى ەسەبىنەن شىعىن دا ءوستى. قوسالقى بولشەكتەر ساتىپ الىپ، جىلجىمالى قۇرامدى تارتىپكە كەلتىردىك. سوعان ساي جازعا جانە قىسقا دايىندىق جۇرگىزىلدى. ەندى كىرىس پەن شىعىس اراسىندا ايىرما بيۋدجەت ەسەبىنەن جابىلۋى ءتيىس. ەگەر بيۋدجەت مۇندايعا دايىن بولماسا، وندا ەكىنشى نۇسقا رەتىندە ءتاريفتى كوتەرۋ تۋرالى ايتۋعا بولادى. ءبىراق ازىرشە ءبىز تاريفتى كوتەرۋ جايىندا ءسوز قوزعاپ وتىرعان جوقپىز»، - دەدى ول «قوعامدىق كولىك: رەفورمالار جانە دامۋ جولدارى» اتتى كونفەرەنسيا اياسىندا ب ا ق وكىلدەرىنە بەرگەن سۇحباتىندا.
ونىڭ اتاپ وتۋىنشە، قازىرگى ۋاقىتتا كومپانيا ءبىر جىلداعى جولاۋشىلار تاسىمالىنا قاتىستى دەرەكتەردى العان. اتالعان دەرەكتەر ساراپتامالىق ەسەپتەۋلەرمەن بىرگە تاريفتىك كومييسسيانىڭ قاراۋىنا ەنگىزىلىپ وتىر. وسىدان كەيىن بۇل ماسەلە قوعامدىق كەڭەستە، قالالىق ءماسليحاتتا تالقىلانىپ، ەسەپ ايىرىسۋ ءتاريفى قانداي بولۋى كەرەكتىگى انىقتالادى.
«بەكىتىلگەن تاريفتى اۋىستىرۋ، ياعني 90 تەڭگەدەن كوتەرۋ جايىندا ءسوز قوزعالىپ وتىرعان جوق. ءبىز سۋبسيديالاۋ مۇمكىندىگى جانە اۆتوبۋس پاركتەرى الۋى ءتيىس جەتىسپەيتىن قاراجات جايىندا ايتىپ وتىرمىز. ءبىزدىڭ ەسەبىمىزگە سايكەس، اۆتوبۋس پاركتەرىنە جىلىنا 15,7 ميلليارد تەڭگە قاجەت. جالپى، جىل سوڭىنا دەيىن 90 تەڭگە دەڭگەيىندە بەكىتىلگەن تاريفتىڭ كوتەرىلمەيتىنىنە سەنىمدىمىن»، - دەدى ب. يگەنبەردينوۆ.
ونىڭ اتاپ وتۋىنشە، كەلەسى جىلى قوعامدىق كولىك تاريفتەرىنە قاتىستى ماسەلە تالقىلانادى، بيۋدجەتتىك مۇمكىنشىلىكتەر قاراستىرىلادى.
«سودان كەيىن ءبىز قالالىقتارعا قولايلى بولاتىن قانداي دا ءبىر جاڭا تاريفتىك جوسپار ەنگىزەمىز نەمەسە بيۋدجەت ءوز باپتارىن قايتا قاراستىرادى. ويتكەنى، بارلىق باعدارلار انىقتالعان. بۇعان قوسا، قالانىڭ جارتىسى قوعامدىق كولىكپەن جۇرەدى. سوندىقتان قازىر نارازىلىق تولقىنىن تۋىنداتۋدىڭ ءمانى دە جوق. مەنىڭشە، اكىمدىكپەن بىرلەسىپ كوڭىلگە قونىمدى ءارى وڭتايلى شەشىم تابامىز»، - دەدى كومپانيا باسشىسى.
اۆتور: مارلان جيەمباي