وبىردان ەمدەلۋدەن قورىقپاۋ كەرەك - باس ونكولوگ

«ەمدەلگەندەردىڭ كوبى ءوزىنىڭ باستان وتكەرگەن پروبلەماسىن جاريا ەتۋدەن باس تارتادى. بىزدە ونى «جامان اۋرۋ» دەيدى. سونىمەن قاتار، بۇل اۋرۋعا شالدىقسا دا، ءوزىنىڭ وتباسىنا ايتپايتىن ادامدار كەزدەسەدى. ادامدار ستاتيستيكانى ەستىگەن كەزدە قاتەرلى ىسىك اۋرۋىنا بايلانىستى ۇرەيلەرى ارتا تۇسەدى. تەكسەرۋدەن بارىنشا ەرتە وتكەن جاعدايدا اۋرۋدى جەڭىپ شىعۋ مۇمكىندىگى زور. سوندىقتان حالىق اۋرۋدان قورىقپاۋى ءتيىس، ويتكەنى ەلىمىزدە وبىردان ەمدەلۋدىڭ ءتيىستى مۇمكىندىكتەرى بار»، - دەدى د. قايداروۆا ونكولوگياداعى دۇنيەجۇزىلىك كوشباسشىلار سامميتىندە تىلشىلەر ساۋالىنا جاۋاپ بەرە وتىرىپ.

ونىڭ ايتۋىنشا، 180 مىڭ ناۋقاستىڭ اراسىندا 90 مىڭى وبىردان ساۋىعىپ كەتتى. الايدا جىل سايىنعى ءولىم-ءجىتىم 15 مىڭعا جۋىق.

«تولىقتاي ساۋىعىپ كەتكەندەر 52 پايىز دەڭگەيىندە، ولار بۇل اۋرۋدى جەڭىپ شىققان ادامدار. ەمدەلۋشىلەر بىزدە بەس جىل جانە ودان دا ارتىق مەرزىمدە تىركەۋدە تۇرادى»، - دەدى د. قايداروۆا.

بۇدان بۇرىن حابارلانعانداي، بۇگىن ەلوردادا ونكولوگياداعى دۇنيەجۇزىلىك كوشباسشىلار سامميتىنىڭ جۇمىسى باستالدى. شاراعا 70 ەلدەن 350 دەلەگات قاتىسىپ جاتىر.

اۆتور: رۋسلان عابباسوۆ