وڭتۇستىك كورەيا قازاقستان ازاماتتارىنىڭ كەلۋىنە شەكتەۋ قويا ما

بۇل تۋرالى ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆ ايتتى، دەپ حابارلايدى قازاقپارات ءتىلشىسى.

«وزدەرىڭىزدەي ءبىز دە بۇقارالىق اقپارات قۇرالدارىنان «كورەيا تاراپى قازاقستان ازاماتتارىنىڭ ەلگە كەلۋىنە شەكتەۋ قويادى» دەگەن اقپاراتتى كوردىك. وسىعان وراي مۇنداي اقپاراتتىڭ بىزگە رەسمي كەلمەگەندىگىن حابارلايمىز. رەسمي حابار كەلىپ تۇسسە، وندا ءبىز ونى جاريالايمىز»، - دەدى ايبەك سمادياروۆ.

ونىڭ دەرەگىنشە، 2019 -جىلدىڭ 1 -قىركۇيەگىندەگى كورەي تاراپىنىڭ بەرگەن دەرەكتەرىنە سايكەس، قازىرگى ۋاقىتتا وڭتۇستىك كورەيانىڭ اۋماعىندا 10785 قازاقستان ازاماتى ءجۇر.

«فورۋم باستالار الدىندا ءبىزدىڭ ءمينيسترىمىز كورەيالىق ارىپتەسىمەن ەكىجاقتى كەزدەسۋ وتكىزدى. ونىڭ بارىسىندا كورەيالىق تاراپپەن ەكى ەلدىڭ اراسىنداعى كوشى-قون ساياساتى ماسەلەلەرىن قاراستىردى. ءبىراق، ءمان- جايىن سىزدەرگە جاريا ەتە المايمىن»، - دەدى رەسمي وكىل.

ايتا كەتەيىك، ق ر سىرتقى ىستەر مينيسترلىگىندە «ورتالىق ازيا - وڭتۇستىك كورەيا» 12-فورۋمى ءوز جۇمىسىن باستادى. شاراعا قازاقستان، وزبەكستان، قىرعىزستان سىرتقى ىستەر مينيسترلەرى قاتىسۋدا. ال تۇرىكمەنستان تاراپىنان سول ەلدىڭ قازاقستانداعى ەلشىسى قاتىسىپ وتىر.

اۆتور: مارلان جيەمباي