ەلىمىزدە ءسۇت بەزىنىڭ قاتەرلى ىسىگى جاسارىپ بارادى - باس ونكولوگ- دارىگەر

None
None
نۇر-سۇلتان. قازاقپارات – ق ر دەنساۋلىق ساقتاۋ مينيسترلىگىنىڭ باس ونكولوگ-دارىگەرى، قازاق ۇلتتىق ونكولوگيا جانە راديولوگيا ينستيتۋتىنىڭ ديرەكتورى ديليارا قايداروۆا قازاقستاندا ءسۇت بەزىنىڭ قاتەرلى ىسىگىمەن اۋىراتىندار قاتارى جاسارىپ بارا جاتقانىن ءمالىم ەتتى، دەپ حابارلايدى قازاقپارات ءتىلشىسى.

«ءبىز حالىققا وبىر اۋرۋلارىن انىقتايتىن تەكسەرىستەرگە، سكرينينگتەرگە كەلىڭىزدەر دەپ، الدىن الۋ جۇمىستارىن بارىنشا ناسيحاتتايمىز. ءومىرىڭىزدىڭ ءبىر كۇنىن تەكسەرىسكە ارناڭىز. ءسۇت بەزىنىڭ قاتەرلى ىسىگى ءقازىر ەلىمىزدە جاسارىپ بارادى. بۇل دەرتكە 32 جاسىندا، ءتىپتى 28 جاسىندا شالدىققاندار كەزدەستى. سول سەبەپتى، تەگىن تەكسەرىستەن ءوتۋ جاسىن 50 دەن 40 جاسقا دەيىن تومەندەتتىك. ياعني، وسى جاستاعى ايەلدەر كەز كەلگەن كلينيكاعا كەلىپ، تەگىن مامموگرافيادان وتە الادى. مامموگرافتار بارلىق جەردە بار»، - دەدى ديليارا قايداروۆا ونكولوگياداعى دۇنيەجۇزىلىك كوشباسشىلار سامميتىندە تىلشىلەرگە بەرگەن سۇحباتىندا.

باس ونكولوگ-دارىگەردىڭ ايتۋىنشا، ءسۇت بەزىنىڭ قاتەرلى ىسىگى بۇكىل الەم ەلدەرىندە جاسارىپ بارادى. ادامنىڭ ۋايىم-قايعىدا بولۋى، دۇرىس تاماقتانباۋى، د ن ك-نىڭ وزگەرۋىنە الىپ كەلەتىن ءدارى-دارمەكتى قابىلداۋى مەن جايسىز ەكولوگيانىڭ كەسەلىنەن ايەلدەر بۇل اۋرۋعا شالدىعۋى ابدەن مۇمكىن.

ايتا كەتسەك، بۇعان دەيىن ديليارا قايداروۆا اتا-انانىڭ رۇقساتىمەن بالالارعا جاتىر موينى قاتەرلى ىسىگىنە قارسى ۆاكسيناتسيا جۇرگىزىلەتىنىن ءمالىم ەتكەن بولاتىن.

ەسكە سالا كەتسەك، ەلوردادا كەشە ونكولوگياداعى دۇنيەجۇزىلىك كوشباسشىلار سامميتى باستالدى. فورۋم جۇمىسىنا حالىقارالىق وبىرعا قارسى وداق (UICC) پرەزيدەنتى، جوعارى مارتەبەلى حانشايىم دينا مايرەد، قازاقستان دەنساۋلىق ساقتاۋ ءمينيسترى ەلجان ءبىرتانوۆ قاتىسۋدا.

ەلباسى نۇرسۇلتان نازاربايەۆ بۇگىن ونكولوگياداعى دۇنيەجۇزىلىك كوشباسشىلار ءسامميتىنىڭ قاتىسۋشىلارىنا قۇتتىقتاۋ حات جولدادى.

اۆتور: ايان بەكەن ۇلى

سوڭعى جاڭالىقتار