قازاق تىلىندە شىعاتىن «شۇعىلا»، «مۇرا» جۋرنالى ماناسقا كەلدى - شەتەلدەگى قازاق ءتىلدى ب ا ق- قا شولۋ

قىسقى ساياحات كورمەسى التايدا اشىلدى - «جەنمين جيباو» (People Daily)

قىتايدىڭ التاي قالاسىنداعى ايماقتىق سپورت سارايىندا شىڭجاڭنىڭ XIV قىسقى تۋريستىك كورمەسى اشىلدى، - دەپ حابارلايدى kazakh.people.com.cn سايتى.

بۇل جولعى تۋريستىك كورمەنىڭ ماقساتى - جىبەك جولىن ساياحاتتاپ، جەرگىلىكتى حالىقتىڭ ۇلتتىق ونىمدەرى ساۋداسىن جانە قىسقى تۋريزم مادەنيەتىن دامىتۋ.

ايتا كەتۋ كەرەك، شىنجاڭ قىسقى تۋريزم كورمەسى 2006 -جىلدان بەرى، ۇزدىكسىز 13 رەت وتكىزىلگەن بولاتىن.

وزبەكستانداعى كاسىپكەرلەرگە كەدەرگى بولعان ءۇش نەگىزگى پروبلەما انىقتالدى - «ءو ز ا» اقپاراتتىق اگەنتتىگى

ورتالىق سايلاۋ كوميسسياسىنداعى حالىقارالىق باسپا ءسوز كلۋبىنىڭ كەزەكتى باسپا ءسوز ءماسليحاتىندا كاسىپكەرلىكتەگى وزەكتى ماسەلەلەر تۋرالى ايتىلدى، دەپ حابارلايدى وزبەكستاننىڭ «ءو ز ا» مەملەكەتتىك اقپاراتتىق اگەنتتىگى.

وندا، وزبەكستانداعى كاسىپكەرلەردىڭ كاسىبىن نىعايتۋ مەن جۇمىسىن جانداندىرۋعا كەسىرىن تيگىزىپ بيزنەسىنە تۇساۋ بولىپ تۇعان نەگىزگى ءۇش ماسەلە كوتەرىلىپ، سول جايىندا پىكىرتالاس ءوربىدى. قازىرگى كەزدەگى وزەكتى سانالاتىن كاسىپتىڭ دامۋىنا كەدەرگىنىڭ ەڭ نەگىزگىسى جەر الۋ، بانكتەردەن كرەديت الۋ مەن كوممۋنيكاتسيالار جانە گاز، ەلەكترلىك جاعدايى وتە وزەكتى بولىپ وتىر، دەپ جازادى وزبەكستاندىق ب ا ق.

«حالىقارالىق باسپا ءسوز كلۋبىنىڭ كەزەكتى باسپا ءسوز ءماسليحاتىنا وزبەكستان رەسپۋبليكاسى جوعارى ءماجىلىسىنىڭ زاڭ شىعارۋ پالاتاسىنىڭ، ساياسي پارتيالاردىڭ، ساۋدا- ونەركاسىپ پالاتاسىنىڭ وكىلدەرى، بيزنەس- ومبۋدسمەندەر مەن كاسىپكەرلەر قاتىسۋدا. ءباسپاسوز ءماسليحاتى جالعاسۋدا»، - دەپ تۇيىندەيدى «ءو ز ا».

«شۇعىلا» ، «مۇرا» جۋرنالى ماناسقا كەلدى - قىتايدىڭ «ورتالىق حالىق راديوسى» (CNR)

قازاق تىلىندە شىعاتىن ادەبي جۋرنال «شۇعىلا» مەن تاريحي مادەنيەتتىڭ جوقتاۋشىسى «مۇرا» جۋرنالىنىڭ رەداكسيا باسشىلارى وسى اپتادا ماناس اۋدانىنا بارىپ جۋرنالدىڭ تۇراقتى اۆتورلارىمەن جانە وقىرماندارىمەن كەزدەسۋ وتكىزدى، دەپ حابارلايدى قىتايداعى kazakcnr.com سايتى.

اتالعان ب ا ق- تىڭ مالىمەتىنە سۇيەنسەك، بۇل جولعى ءىس- شارا شىڭجاڭ ولكەسىنىڭ ادەبيەت- كوركەمونەر قوعامىنىڭ قۇرىلتايشىلىعىمەن شىعاتىن «شۇعىلا» جانە «مۇرا» جۋرنالدارىنىڭ تارالىمىن كوبەيتىپ، وقىرمان سۇرانىسىنا ساي ساپالى باسىلىمعا اينالدىرۋ ءۇشىن ۇيىمداستىرىلعان.

قوس جۋرنال باسشىلىعى رەداكسيا قىزمەتىن ۇلكەن جاۋاپكەرشىلىكپەن ىستەۋدى، جۋرنالدىڭ ساپاسى، شىعارما ومىرشەڭدىگىمەن بايلانىستى ەكەنىن، رەداكسيا مەن اۆتورلار قارىم- قاتىناسىن كۇشەيتۋ ارقىلى وقىرمان سانىن ارتتىرۋعا بولاتىنى سىندى مازمۇنداردى كەڭىنەن باياندادى. جەرگىلىكتى اۆتورلاردان «شۇعىلا»، «مۇرا» جۋرنالىنا جولدانعان ۇسىنىس پىكىرلەرىن تىڭدادى. «مۇرا» جۋرنالىنىڭ وكىلى قاميت زامەرحان ۇلى دا ءوز جۋرنالى تۋرالى كەڭىنەن ايتا كەلىپ، باسىلىم ساپاسىنىڭ اۆتورلارمەن تىكە قاتىستى ەكەنىن ايتتى. ەل اراسىندا ءالى كۇنگە جارىققا شىعىپ ۇلگەرمەگەن تاريحي اقىندار ايتىسى، اڭىز- اڭگىمەلەر، شەشەندىك سوزدەر، ءازىل- قاعىتپالار، قيسسا- داستاندار سياقتى جاقۇتتاردى جيناۋ، رەتتەۋ، جۋرنالعا بەرۋ جاقتارىندا اۆتورلارمەن وي ءبولىستى.

«جۋرنالدار رەداكسياسىنىڭ ماناس اۋدانىنداعى قازاق قالامگەرلەرمەن جۇزدەسىپ ۇگىت- ءناسيحات جۇرگىزۋى، ءوزارا پىكىر الماسۋى ماناستىق قازاق اقىن- جازۋشىلارىن ساپالى تۋىندى جاساۋعا شابىتتاندىردى. اسىرەسە، قوس جۋرنالدىڭ بۇل ساپارى ماناس سەكىلدى قازاقتارى كوپ اۋداننىڭ مادەنيەتى مەن ادەبيەتىنىڭ ءارى قاراي دامۋىنا تاماشا باستاما بولدى»، - دەپ تۇيىندەيدى اتالعان باسىلىم.

يران، قازاقستان مەن جاپونيا كاراتەدەن الەمنىڭ ەڭ ۇزدىك ۇشتىگىنە ەندى - «فارس» اقپارات اگەنتتىگى

ەرلەر اراسىنداعى يراننىڭ ۇلتتىق كاراتە كومانداسى 2019 -جىلعى الەمنىڭ ەڭ ۇزدىك كومانداسى اتاندى، دەپ حابارلايدى parstoday اقپارات اگەنتتىگى.

اتالعان اقپارات كوزىنىڭ حابارلاۋىنشا، ەرلەر اراسىنداعى يراننىڭ ۇلتتىق كاراتە كومانداسى «Karate One»  پرەمەر- ليگا تۋرنيرىنىڭ 2019 -جىلعى 7 كەزەڭىندە 7 التىن، 10 كۇمىس، 13 قولامەن جالپى 30 مەدال الىپ، الەمنىڭ كاراتە كوماندالارى اراسىندا ەڭ ۇزدىك كوماندا اتانعان.

«يراننان كەيىن قازاقستان كومانداسى 6 التىن، 3 كۇمىس، 7 قولامەن جالپى 16 مەدال الىپ، ەكىنشى ورىن السا، جاپونيا الەم كاراتەسىندەگى ەڭ مىقتى ءداستۇرلى كوماندا رەتىندە 5 التىن، 2 كۇمىس، 6 قولامەن جالپى ەسەپتە 13 مەدال الىپ، ءۇشىنشى ورىنعا تابان تىرەدى»، دەپ تۇيىندەيدى يراندىق ب ا ق.

1500 جىلدىق تاريحى بار شىراقتار تابىلدى - TRT

ديارباكىردىڭ (تۇركيانىڭ وڭتۇستىك- شىعىسىنداعى قالا) چىنار اۋدانى ماڭىندا زەرزيەۆان قامالىندا جۇرگىزىلگەن قازبالاردا ريم داۋىرىنەن قالعان 1500 جىلدىق تاريحى بار 48 دانا شىراق جارىققا شىقتى، دەپ جازادى تۇركيا راديو تەلەۆيزيا پورتالى.

اتالعان اۋدانعا 13 ك م قاشىقتىقتاعى زەرزيەۆان قامالى ريم يمپەرياسى كەزىندە اسكەري بازا رەتىندە قولدانىلعان. وسى جەردە تۇركيا رەسپۋبليكاسى مادەنيەت جانە تۋريزم مينيسترلىگىنىڭ باستاماسىمەن قولعا الىنعان قازبا بەس جىلدان بەرى جالعاسىپ كەلگەن.

«بۇندا بيىكتىگى 12-15 مەتر، ۇزىندىعى 1200 مەترلىك قورعان قالدىعى، بيىكتىگى 21 مەتر باقىلاۋ جانە قورعانىس مۇناراسى بولعان. سونداي- اق، شىركەۋ، باسقارۋ عيماراتى، تۇرعىن ۇيلەر، داقىل جانە قارۋ قويمالارى بولعانى انىقتالدى. بۇعان قوسا جەر استى عيباداتحاناسى، جارتاس قابىرلەرى، سۋ كانالدارى جانە 54 سۋ قويماسى بار قامال مىڭداعان جىلدىق تاريحتى اشىپ بەرەدى»، دەپ جازدى تۇركيالىق ب ا ق.

اۆتور بەيسەن سۇلتان