ەلجان ءبىرتانوۆ ءدارى- دارمەك ساپاسىن تەكسەرۋ جايىندا ايتتى

None
None
نۇر- سۇلتان. قازاقپارات – ق ر دەنساۋلىق ساقتاۋ ءمينيسترى ەلجان ءبىرتانوۆ ەلىمىزدە دارىلىك زاتتاردىڭ ساپاسى قالاي تەكسەرىلەتىندىگىن ايتتى، دەپ حابارلايدى قازاقپارات ءتىلشىسى.

«ەگەر ادامنىڭ نەمەسە مەديتسينا قىزمەتكەرىنىڭ ءدارى- دارمەك ساپاسىنا كۇدىگى بولسا، وندا ول ءۇشىن ارنايى مەملەكەتتىك ورگان - تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتى بار. بىرىككەن كوميتەتتىڭ قۇرىلىمىنا فارماتسيالىق باقىلاۋ كوميتەتى، سونىمەن قاتار سانيتارلىق ساراپتاما كىرىپ وتىر. وسىناۋ مەملەكەتتىك ورگان ءدارى- دارمەكتىڭ ساپاسى مەن قاۋىپسىزدىگىنە جاۋاپ بەرەدى. تىركەلگەن شاعىم نەگىزىندە «سارى كارتا» دەپ اتالاتىن جاناما اسەرلەر بولسا، وندا زاڭنامادا بەكىتىلگەن ستاندارتتى پروتسەدۋرالار بويىنشا اتالعان دارىلەر نەمەسە مەديتسينالىق ماقساتتاعى بۇيىمدار الىنادى. سودان كەيىن وعان تەكسەرۋ جۇرگىزىلەدى»، - دەدى مينيستر ەلورداداعى زەرتحانالىق سىناقتار ورتالىعىنىڭ اشىلۋ اياسىندا ب ا ق وكىلدەرىنە بەرگەن سۇحباتىندا.

ەلجان ءبىرتانوۆتىڭ اتاپ وتۋىنشە، ءدارى- دارمەكتىڭ بارلىق تۇرلەرىن تەكسەرۋ سىناق زەرتحاناسىندا جۇزەگە اسىرىلادى.

«ەگەر ءدارى ساپاسى ساي بولماسا، وندا سوعان وراي ءدارى- دارمەك اينالىمىنان الىنىپ، نارىققا جىبەرىلمەيدى. الاقول كاسىپكەرگە قاتىستى دا ءتيىستى شارالار، ونىڭ ىشىندە اكىمشىلىك- قىلمىستىق جاۋاپكەرشىلىك كوزدەلگەن. ءبىزدىڭ مىندەتىمىز - بارلىق قازاقستاندىققا ءدارى- دارمەكتىڭ قاۋىپسىزدىگىن قامتاماسىز ەتۋ ءۇشىن بۇكىل جاعداي بار ەكەندىگىن كورسەتۋ».

ونىڭ ناقتىلاي تۇسۋىنشە، بارلىق ءدارى- دارمەك مىندەتتى ءتارتىپپىن باقىلانۋى ءتيىس. الايدا قازاقستاننىڭ قولدانىستاعى زاڭناماسىنا سايكەس ءدارىحانالاردى تەكسەرۋگە بولادى.

«مۇنداي جاعدايدا، ازاماتتاردان نەمەسە دارىگەرلەردەن تۇسەتىن شاعىمدار جىلىنا 2-3 رەت كەزدەسەدى. ءبىز مۇنىڭ بارلىعىن، ياعني كونتراباندالىق ءدارى- دارمەكتىڭ بار ەكەندىگىن جاقسى تۇسىنەمىز. ءبىز ءۇشىن شاعىمنىڭ تۇسكەنى ماڭىزدى. ءدارىحانالاردى ارالاپ، تەكسەرۋگە قۇقىعىمىز جوق. بۇل - زاڭعا قايشى. بىزگە جوسپاردان تىس، كەنەتتەن ءدارىحانالاردى تەكسەرۋگە تىيىم سالاتىن كاسىپكەرلىك كودەكس بار. ەگەر حالىقتان جانە مەديتسينا قىزمەتكەرلەرىنەن شاعىم بولسا، وندا تەكسەرەمىز. دەگەنمەن مۇنداي جاعداي سيرەك كەزدەسەدى»، - دەدى ەلجان ءبىرتانوۆ.

اۆتور: مارلان جيەمباي

سوڭعى جاڭالىقتار