وزبەكستاندا جەكە كولىكپەن جۇرۋگە تىيىم سالىندى

كوروناۆيرۋسقا قارسى كۇرەس جۇرگىزۋ جونىندەگى ارنايى رەسپۋبليكالىق كوميسسيانىڭ شەشىمىمەن وزبەكستاننىڭ تاشكەنت، نۇكىس جانە وبلىستىق ماڭىزى بار قالالارىندا 30 - ناۋرىز بەن 20 -ءساۋىر ارالىعىندا جەكە ماقساتتاردا كولىكپەن جۇرۋگە تىيىم سالىندى. قالادا رۇقساتسىز جۇرە الاتىن كولىكتەر تىزىمىنە تەك ديپلوماتيالىق، كوممۋنالدىق قىزمەت كورسەتەتىن كولىك قۇرالدارى، مەديتسينالىق- ەپيدەميولوگيالىق قىزمەت كورسەتەتىن، اۋىلشارۋاشىلىق ونىمدەرىن جەتكىزەتىن كولىكتەر، مەديتسينالىق مەكەمەلەرگە جانە ولاردان جەدەل مەديتسينالىق كومەككە (جۇكتىلىك، ومىرگە قاۋىپ توندىرگەن دەنە جاراقاتتارى) مۇقتاج ادامداردى اكەلگەن كولىكتەر، قالالىق جانە اۋداندىق اكىمشىلىك باسشىلارى، ولاردىڭ ورىنباسارلارىنىڭ اۆتوموبيلدەرى، جەرلەۋ كولىكتەرى، جەدەل جانە مەديتسينالىق كومەك ماشينالارى، پاترۋلدىك اۆتو، پوشتا قىزمەتى جانە ازىق- تۇلىكتى كۋرەرلىك جەتكىزۋ كولىكتەرى، سونداي- اق كوممەرتسيالىق بانك اۆتوموبيلدەرى كىرەدى. 29 - ناۋرىزدان باستاپ شەكتەۋ قويۋ كەزەڭىندە قوزعالىس رۇقسات ەتىلگەن اۆتوموبيلدەر ءۇشىن ارنايى رۇقسات (ستيكەرلەردى) بەرۋ باستالادى. كولىككە جەكە مۇددەمەن ءمىنىپ جۇرۋگە تىيىم سالىنعان.