11:40, 31 - ناۋرىز 2020 | GMT +6
يممۋنيتەتى جاقسى ادامداردىڭ اعزاسى كوروناۆيرۋستى ءوز بەتىنشە جەڭۋى مۇمكىن - زەرتتەۋ
نۇر-سۇلتان. قازاقپارات – مەلبۋرن ۋنيۆەرسيتەتىنىڭ عالىمدارى يممۋنيتەتى جاقسى ادامداردىڭ اعزاسى كوروناۆيرۋس ينفەكسياسىن ءوز بەتىنشە جەڭە الادى دەگەن قورىتىندىعا كەلدى، - دەپ حابارلايدى «حابار24» Nature Medicine جۋرنالىنا سىلتەمە جاساپ.
زەرتتەۋ نىسانى رەتىندە اۋسترالياعا كەلگەن قىتايدىڭ ۋحان قالاسىنىڭ 47 جاستاعى تۇرعىنى الىنعان. كەيىن ايەل ادام كوروناۆيرۋستىڭ بەلگىلەرى - السىزدىك، ەنتىگۋ، قۇرعاق جوتەل جانە قىزۋدىڭ كوتەرىلۋىمەن اۋرۋحاناعا تۇسكەن. ناۋقاستا وعان دەيىن پاتولوگيالىق اۋرۋلار مەن زيان ادەتتەر بولماعان. اۋرۋحانادا ناۋقاسقا انتيبيوتيكتەر نەمەسە ۆيرۋسقا قارسى پرەپاراتتار بەرىلمەگەن.
دارىگەرلەردىڭ قابىلداعان جالعىز شاراسى اعزاداعى سۋ بالانسىن ساقتاۋ ءۇشىن تامىرعا سۇيىقتىق ەنگىزۋ بولعان ەكەن. ناتيجەسىندە ناۋقاس ەكى اپتادان كەيىن تولىق جازىلىپ كەتكەن. ودان الىنعان قان تالداۋىنىڭ ناتيجەلەرى يممۋن جۇيەسىنىڭ جاسۋشالارىنىڭ ءوسۋىن كورسەتتى، بۇل ورگانيزمنىڭ ادەتتەگى ماۋسىمدىق تۇماۋعا قارسى رەاكسياسى دەيدى دارىگەرلەر.