سولتۇستىك قازاقستان وبلىسىندا كوروناۆيرۋس جۇقتىرعان ايەل وبلىس اۋماعىنان شىقپاعان

س ق و دەنساۋلىق ساقتاۋ باسقارماسىنىڭ باسشىسى تيمۋر سۇلتانعازيەۆتىڭ ايتۋىنشا، قاۋىپتى ىندەتتى جۇقتىرعان ايەل تايىنشا اۋدانى كەللەروۆكا ەلدى مەكەنىنىڭ تۇرعىنى. 1980 -جىلى تۋعان ايەل وبلىس اۋماعىنان ەشقايدا شىقپاعان. دارىگەرلەر ونى جۇقتىرۋى مۇمكىن دەپ تەكسەرگەن ەكەن. ونىڭ سىرقات ەكەنى كەشە كەشكە انىقتالىپ، بىردەن پەتروپاۆلداعى جۇقپالى اۋرۋلار اۋرۋحاناسىنا، جەكە بوكسكە جاتقىزىلدى. قازىرگى تاڭدا ونىڭ دەنساۋلىعىنا شاعىمى جوق. دەنە قىزۋى جانە جاعدايى ءبىرقالىپتى.

مامانداردىڭ ايتۋىنشا، كەللەروۆكا ەلدى مەكەنى كەشەدەن بەرى كارانتيندە. ال جۇقپالى اۋرۋدى جۇقتىرعان ايەلمەن بايلانىستا بولعانداردىڭ بارلىعى انىقتالىپ، ساراپتاما الىندى. ولاردىڭ ءبارى بۇگىندە كارانتيندە جاتىر. بۇل – س ق و- دا تابىلىپ وتىرعان ەكىنشى جاعداي. بۇعان دەيىن اۋىرعان كەلىنشەكتىڭ قان ساراپتاماسى قايتا تەكسەرىستەن وتكىزىلۋى ءۇشىن الماتىعا جىبەرىلگەن ەدى. س ق و تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى سەرىكباي قاسماقاسوۆتىڭ ايتۋىنشا، ول ساراپتاما الماتىعا دەيىن ەكى كۇن ءجۇرىپ بارعان. سول سەبەپتى قان قۇرامى وزگەرىپ، دۇرىس ناتيجە بەرمەۋى مۇمكىن. سول سەبەپتى سىرقات دەپ تانىلعان كەلىنشەكتى كارانتيننەن شىعارماس بۇرىن تاعى دا تەكسەرمەك. ساراپتاما كارانتيننىڭ 13- كۇنى جاسالىنادى. س ق و دەنساۋلىق ساقتاۋ باسقارماسىنىڭ مالىمەتىنشە، قازىرگى تاڭدا ءۇي كارانتينىندە 494 ادام، پروۆيزورلىق ستاتسيوناردا – 44، ال كارانتيندىك ستاتسيوناردا 30 ادام جاتىر.

اۆتور: اقەركە داۋرەنبەك قىزى