الماتى وبلىسىندا توتەنشە جاعداي رەجيمىن بۇزعان ازامات ۇستالدى

الماتى وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، الەۋمەتتىك جەلى ارقىلى الماتى وبلىسى پوليتسيا دەپارتامەنتىنىڭ باستىعىنا تالدىقورعان قالاسىنىڭ 37 جاستاعى تۇرعىنىنىڭ توتەنشە جاعداي رەجيمىن ساقتاماعانى تۋرالى جاسىرىن حابارلاما كەلىپ تۇسكەن.

«ءالى كۇنگە دەيىن ازاماتتار قاۋىپسىزدىك شارالارىن قولدانباي، بلوك- بەكەتتەردەن ءتۇرلى ارەكەتتەرمەن زاڭسىز وتۋگە تالپىنۋدا. بۇل ايەل دە ءدال وسىنداي ادامداردىڭ قاتارىندا. ونىڭ بلوك- بەكەتتەر ارقىلى الماتىدان تالدىقورعانعا ءوتۋ ارەكەتتەرى ءساتسىز اياقتالعاننان كەيىن، ونىڭ جەكەمەنشىك تاكسي قىزمەتىمەن بەكەتتەردى اينالا ءوتۋ ارقىلى توتەنشە جاعداي رەجيمىن بۇزا وتىرىپ، تالدىقورعان قالاسىنا كەلگەندىگى انىقتالدى. قازىرگى ۋاقىتتا ءتارتىپ بۇزۋشى ۇستالىپ، 14 كۇندىك كارانتينگە ورنالاستىرىلدى»، - دەدى الماتى وبلىسى پوليتسيا دەپارتامەنتى باستىعىنىڭ ورىنباسارى پوليتسيا پولكوۆنيگى بولات تەڭىزبايەۆ.

ق ر ا ق ب ت ك- ءنىڭ 476-بابىنىڭ 1-تارماعىنا سايكەس جاسالعان اكىمشىلىك ماتەريال سوتتىڭ قاراۋىنا جىبەرىلدى. ونى تاسىمالداعان تاكسي جۇرگىزۋشىلەرىن انىقتاۋ جانە جاۋاپقا تارتۋ بويىنشا شارالار قابىلدانۋدا.

«سونىمەن قاتار توتەنشە جاعداي رەجيمىن بۇزعانى ءۇشىن ق ر ا ق ب ت ك- ءنىڭ 476-بابىنا سايكەس، ياعني توتەنشە جاعدايدىڭ جاريالانۋىنا بايلانىستى مەملەكەتتىك ورگان بەلگىلەگەن رەجيمدى بۇزعانى نەمەسە تالاپتاردى ورىنداماعانى ءۇشىن، سونداي- اق جەرگىلىكتى جەردىڭ كومەندانتىنىڭ زاڭدى بۇيرىقتارى مەن وكىمدەرىن ورىنداماعانى ءۇشىن، ەگەر بۇل ارەكەتتەردە (ارەكەتسىزدىكتەردە) قىلمىستىق جازا قولدانىلاتىن ارەكەت بەلگىلەرى بولماسا، ەسكەرتۋ نەمەسە ون ايلىق ەسەپتىك كورسەتكىش مولشەرىندە ايىپپۇل سالۋ نە ون بەس تاۋلىككە دەيىنگى مەرزىمگە اكىمشىلىك قاماۋعا الۋ جازاسى قولدانىلۋى مۇمكىن. سونداي- اق توتەنشە جاعداي جاريالانعان جەردە ق ر ق ك 379-بابىنا سايكەس بيلىك وكىلىنە باعىنباعان ازاماتتارعا ەكى مىڭ ايلىق ەسەپتىك كورسەتكىشكە دەيىنگى مولشەردە ايىپپۇل سالۋعا نە سول مولشەردە تۇزەۋ جۇمىستارىنا نە التى ءجۇز ساعاتقا دەيىنگى مەرزىمگە قوعامدىق جۇمىستارعا تارتۋعا، نە ەكى جىلعا دەيىنگى مەرزىمگە باس بوستاندىعىن شەكتەۋگە، سونداي- اق وسى مەرزىمگە باس بوستاندىعىنان ايىرۋ جازاسى قاراستىرىلعان. ءوزىڭىزدى جانە جاقىندارىڭىزدى ساقتاڭىزدار!»، - دەپ تولىقتىردى پوليتسيا پولكوۆنيگى بولات تەڭىزبايەۆ.

اۆتور: سامال قابىشيەۆا