توقتار سەرىكوۆ: اكەمدى قۇشاقتاپ وتىرىپ و دۇنيەگە اتتاندىردىم

None
None
نۇر-سۇلتان.قازاقپارات - توقتار سەرىكوۆ ومىردەگى اكەسىنىڭ ءرولى ەرەكشە ەكەنىن ايتادى. ءانشى ءوزىن ونەرگە باۋلىعان، كەرەمەت ازامات ەتىپ تاربيەلەگەن اسقار تاۋ اكەسىن ەسكە الدى.

بۇل تۋرالى «تالانتىم- تاعدىرىم» باعدارلاماسىنداي ايتىلدى.

«مەنى ونەرگە باۋلىعام العاشقى ۇستازىم اكەم. ءاندى دە ايتاتىن، دومبىرانى دا شەرتەتىن. سول كىسىگە قاراپ دومبىرانى ۇيرەندىم، ءان ايتتىم. مەنى قالاعا اتتاندىرعان ءوزى ەدى. الماتىعا قالدىرار شاقتا اكەممەن بىرگە اۋىلعا قايتام دەپ جىلاعانىم بار. سول كەزدە اكەم «مەن ءومىر بويى مال باقتىم. قارا تابان قۇل بولدىم. ەڭ قۇرىعاندا سەن قالادا قالساڭشى. وقىساڭشى. ءبىلىم الساڭشى. مەن قۇساپ اۋىلدا جۇرەسىڭ بە؟ ەلدى كور، جەردى كور« دەدى. وسى ءسوز مەنى ەسەيتىپ جىبەردى. كەيىن توقتاردىڭ اكەسى دەپ ىزدەپ بارىپ، ارنايى امانداسقان ۇلكەن كىسىلەر بولدى. مەنىڭ جەتىستىگىمدى كوردى»، - دەيدى ءانشى.

ءانشىنىڭ اكەسى قادىر اعا 75 جاسىندا دۇنيەدەن وزدى. ءانشى ءوزى قاسىندا بولىپ، باۋىرىنا باسىپ وتىرىپ قوشتاسقانىن ەسكە الدى.

«اكەم وكپەسى اۋىرىپ، 75 جاسىندا ومىردەن وزدى. قاسىندا بولدىق. مۇسىلمان بولعان سوڭ ءبىرىنشى كەزەكتە ويلايتىنىمىز، كاليماعا ءتىلى كەلەر مە ەكەن دەگەن وي مازالادى. اكەمنىڭ اۋىرىپ جاتقانىن كۇندە كورىپ ءجۇردىم. مەن اكەمنىڭ قوينىندا جاتامىن. مەنى جەلكەمنەن قۇشاقتاپ، سەن مەنىڭ داۋلەتىمسىڭ عوي دەدى. كەزىندە مۇرتىما مۇز قاتىپ، مال باعىپ جۇرگەندە كەيىن وسىلاي جاقسى ءومىر سۇرەم دەپ ويلادىم با؟ سەندەردىڭ جەتىستىكتەرىڭدى كوردىم. مەن باقىتتىمىن دەدى. مەن كۇندەلىكتى كاليما ايتىپ جاتام دەدى». مەن سوعان قۋانىپ قالدىم. «جانىڭدى الار پەرىشتە كەلگەندە قاسىڭداعى ادامعا قوسىلىپ، كاليمانى ايتساڭ دا بولادى» دەدىم. باستىسى قورىقپاۋ كەرەك دەدىم. ەرتەسى كوجە جاساپ، قويدىڭ قابىرعاسىنىڭ سۇبەسىنەن بارىمىزگە تىلىمدەپ كەسىپ بەردى، اۋىلدان انامىزدى الدىرتتىق. ءبارىمىز ءبىر داستارحاننان اس ىشتىك. ءبىر كەزدە اكەم بىزگە قاراپ، «مەن بولدىم» دەدى. بۇل وسىمەن مەن كەتتىم دەگەنى ەكەن. ماعان ءتىلى بايلانىپ بارا جاتقانىن ءبىلدىردى. مەن وڭ قۇلاعىنا سىبىرلاپ، قۇشاقتاتادىم. وسىلاي اكەمدى و دۇنيەگە قۇشاقتاپ وتىرىپ اتتاندىردىم«، - دەيدى كوزىنە جاس العان ءانشى.

توقتار سەرىكوۆ اكەسىنىڭ ءولىمى اق ءولىم بولعان دەپ سانايدى. اكەسىنىڭ جانى ءجاناتتا بولادى، سول جاقتان ءوزىن كۇتەدى دەپ ۇمىتتەنەدى. ءلايىم سولاي بولعاي.

سوڭعى جاڭالىقتار