ىرىسبەك دابەي، جازۋشى: قازاقستاندا جازۋشىلىقپەن كۇن كورۋ قازىرشە مۇمكىن ەمەس

None
None
نۇر-سۇلتان. قازاقپارات - «قالاماقىڭ قالاي، قازاق قالامگەرلەرى؟!» ساۋالناماسى اياسىندا اقىن، جازۋشى، «شىق تۇنعان جولدار»، «اكەلەرىمىز ايتاتىن اڭگىمە»، «جىلقى اتىلعان جاز»، «قوڭىز» شىعارمالارىنىڭ اۆتورى ىرىسبەك دابەيمەن اڭگىمەلەستىك.

- وتكەن جىلعى Forbes-تىڭ الەمدەگى ەڭ تابىستى 100 ادامىنىڭ قاتارىنا 2 جازۋشى ەندى. ونىڭ ءبىرى - دجوان روۋلينگ. تابىسى 92 ميلليون دوللار. ەكىنشىسى اقشتىڭ بۇرىنعى پرەزيدەنتى بيلل كلينتونمەن بىرىگىپ كىتاپ جازاتىن دجەيمس پاتتەرسون. ونىڭ تابىسى 70 ميلليون دوللار. ەلىمىزدە جاعداي قالاي؟ قازاقستاندا كىتاپ جازىپ ميلليون تەڭگە تابۋعا بولا ما؟

- ەلىمىزدىڭ كىتاپ نارىعىن، ارينە، دامىعان، حالقىنىڭ سانى كوپ ەلدەرمەن سالىستىرۋعا كەلمەيدى. 20 ميلليونعا جەتپەيتىن حالقى بار، ونىڭ ءوزى ورىس ءتىلدى، قازاق ءتىلدى اۋديتورياعا جىكتەلەتىن، كىتاپ وقيتىن-وقىمايتىن بولىپ بولىنەتىن ەلدە كىتاپ نارىعى اسا ءماز بولمايتىنى بەلگىلى. «ميلليون تەڭگە» دەگەن اسا جوعارى كورسەتكىش ەمەس، كىتاپ جازىپ، ونداي قارجىعا قول جەتكىزۋگە بولادى.

- ءسىزدىڭ بيىلعى (نەمەسە بىلتىرعى) قالاماقىڭىز قانشا؟

- سوڭعى جىلدارى جىلىنا ءبىر كىتاپ شىعارىپ، بازارعا سالىپ ءجۇرمىن. ورتا ەسەپپەن 1500-2000 تەڭگەدەن ەكى مىڭعا جۋىق كىتابىم ساتىلادى. ەگەر ونى قالاماقى دەپ ساناساق، ءوزىڭىز ەسەپتەي بەرىڭىز.

- كەيىنگى كەزدە الەۋمەتتىك جەلىلەردە كىتاپ ساتاتىندار كوبەيىپتى. بۇل قۇپتارلىق ءىس. قازاق وقىرماندارى قازاقشا كىتاپ ساتىپ الىپ وقۋعا دايىن با؟

- ارينە، سۇرانىسىن قاناعاتتاندىراتىن كىتاپ بولسا، قازاق وقىرماندارى ساتىپ الىپ وقۋعا دايىن.

- ەلىمىزدەگى «مەلومان»، «كنيجنىي گورود» سىندى تانىمال كىتاپ دۇكەندەرىنە بارساڭ ورىسشا كىتاپتار، ورىسشا شەتەل اۋدارمالارى سامساپ تۇرادى. ەسەسىنە الۋشىلار دا كوپ. قازاقشا اۋدارما نەمەسە قازاق قالامگەرلەرىنىڭ كىتابىن ىزدەسەڭ تاپپايسىڭ. نەگە؟ الدە قازاق قالامگەرلەرىنە وقىرماندار تاراپىنان شىنىمەن سۇرانىس جوق پا؟ جالپى، قازاقستاندا جازۋشىلىقپەن كۇن كورۋگە بولا ما؟

- ءىرى كىتاپ دۇكەندەرىنەن قازاقشا كىتاپتاردىڭ تابىلماۋى ءبىر جاعىنان سۇرانىسقا ساي (ول مەيلى ادەبي، اۋدارما، موتيۆاتسيالىق، ت. ب. بولسىن) دۇنيەلەردىڭ جوقتىعىنان دا قاراستىرعان ءجون. 14 جىلدىڭ الدىندا «نوبەل» سىيلىعىن العان ورحان پامۋكتىڭ روماندارى اۋدارىلىپ، ەندى- ەندى كىتاپ دۇكەندەرىنە ءتۇسىپ جاتىر. مو يان روماندارىنىڭ اۋدارماسىن ىزدەسەڭ، تاپپايسىڭ. سول سياقتى جىلىنا الەمگە ايگىلى قانشاما بەستسەللەر شىعادى. قىسقاسى، ءبىز سۇرانىسقا ساي دۇنيەلەردى قازاق وقىرماندارىنا ۇسىنۋعا ۇلگەرىپ جاتقان جوقپىز. قازاقستاندا جازۋشىلىقپەن كۇن كورۋ قازىرشە مۇمكىن ەمەس. قوسىمشا تابىس كوزى رەتىندە جازۋشىلار جازعان كىتاپتارىن بازارعا سالىپ كورسە بولادى.

- بىزدە حالىقتىڭ كىتاپ وقۋعا دەگەن ىقىلاسىن وياتىپ، كىتاپ اگەنتتىكتەرىنىڭ جۇمىسىن جانداندىرۋ ءۇشىن مەملەكەت تاراپىنان قانداي ىستەر اتقارىلۋى ءتيىس؟

- كىتاپ اگەنتتىكتەرىنىڭ جۇمىسىن جانداندىرۋ ءۇشىن مەملەكەتتەن بۇرىن قالامگەر ءوزى قۇلشىنۋى كەرەك شىعار. زاماناۋي تاقىرىپتاردى يگەرىپ، بۇگىنگى قوعامنىڭ تىنىس-تىرشىلىگىن كوركەم كارتيناعا اينالدىرسا، مەنىڭشە قوعامنىڭ الدىندا دا، ار-ۇياتىنىڭ الدىندا دا قۇبا-قۇپ بولار ەدى. مەملەكەت تاراپىنان وسىعان دەيىن دە نەبىر مەحانيزمدەر ىسكە قوسىلدى عوي. سول نە بەردى؟ ارينە، ەشتەڭە. جەكە باسپالاردى بايىتىپ، سولارعا تەندەر بەردى. ءبارى جەكە تۇلعانىڭ (قالامگەردىڭ) ار-ۇياتى، جىگەر-قايراتىنا بايلانىستى.

massaget.kz


سوڭعى جاڭالىقتار