ەرالى توعجانوۆ اتىراۋداعى ەپيدەميولوگيالىق احۋالعا قاتىستى شۇعىل جيىن وتكىزدى

پرەمەر- ءمينيستردىڭ ورىنباسارى باستاعان دەلەگاتسيا قۇرامىندا دەنساۋلىق ساقتاۋ ءمينيسترىنىڭ ءبىرىنشى ورىنباسارى مارات شورانوۆ، ەنەرگەتيكا ۆيتسە- ءمينيسترى اسەت ماعاۋوۆ، رەسەيدىڭ تۇتىنۋشىلار قۇقىعىن قورعاۋ جانە ادام ساۋلىعى فەدەرالدى قىزمەتىنىڭ «ميكروب» عىلىمي ورتالىعىنىڭ جەتەكشى عىلىمي قىزمەتكەرى يرينا شاروۆا، رەسەيدىڭ تۇتىنۋشىلار قۇقىعىن قورعاۋ جانە ادام ساۋلىعى فەدەرالدى قىزمەتىنىڭ تۋلا وبلىسىنداعى باسقارما باسشىسى ورىنباسارى زاليمحان وماريەۆ بار.

«اتىراۋ وبلىسىندا بۇگىندە كوروناۆيرۋس ينفەكسياسىنا شالدىققاندار سانى 7150 ادامعا جەتتى. جازىلىپ شىققاندار سانى - 4693 ادام، ال، 13 ادام كوز جۇمعان. ەپيدەميولوگيالىق احۋالدى تۇراقتاندىرۋ ماقساتىندا وبلىستىق اۋرۋحانا جانىنان جۋىردا 400 ورىندىق كارانتيندىك ستاتسيونار اشىلاتىن بولادى»، - دەدى ەرالى توعجانوۆ.

وبلىس اكىمى ماحامبەت دوسمۇحامبەتوۆتىڭ مالىمەتىنشە، قالالىق ەمحانالار جانىنان ستاتسيونارلار جاساقتالىپ، ناۋقاستاردى ەمدەۋ شارالارى اتقارىلۋدا. Саll -ورتالىق اشىلىپ، تاۋلىك بويى بىلىكتى ماماندار تۇرعىندارعا كەڭەس بەرۋدە. قازىرگى ۋاقىتتا وبلىستا 694 ينفەكسيالىق، 895 پروۆيزورلىق، 2328 كارانتيندىك ستاتسيونارلار جۇمىس ىستەپ جاتىر. بۇگىندە ستاتسيونارلار 115 ي ۆ ل اپپاراتىمەن، 29 رەنتگەن اپپاراتىمەن قامتىلعان. سونىمەن بىرگە، 4 كومپيۋتەرلىك توموگرافيا بار. ەمحانالار جانىنان 61 موبيلدى توپ جاساقتالعان.

ولار كوروناۆيرۋس ينفەكسياسىنىڭ سيمپتومسىز جانە جەڭىل تۇرىمەن اۋىرعاندارعا ءۇي جاعدايىندا امبۋلاتورلىق كومەك كورسەتۋدە. كوروناۆيرۋسپەن قاتار، اتىراۋدا پنيەۆمونيامەن سىرقاتتانعانداردىڭ سانى 1307 ادامدى قۇراپ وتىر. وڭىردە ءدارى- دارمەك تاپشىلىعى ماسەلەسى شەشىلۋدە.

قالا مەن اۋدانداردىڭ ءدارىحانالارىنا ەڭ قاجەتتى انتيبيوتيكتەر، قىزۋ تۇسىرەتىن دارىلەر جەتكىزىلىپ جاتىر.

قازىرگى ۋاقىتتا اتىراۋدا پاندەميامەن كۇرەسكە 1429 دارىگەر مامان جۇمىلدىرىلدى. ءبىراق، مەديتسينا ماماندارى جەتىسپەۋشىلىگى ماسەلەسى وتكىر سەزىلەدى. اتىراۋدا 278 دارىگەر جەتىسپەيدى. اتالعان ماسەلەنى شەشۋ ءۇشىن رەسەيمەن كەلىسسوزدەر جاسالىپ، وڭىرگە جاس مامانداردى تارتۋ جۇمىستارى جۇرگىزىلىپ جاتىر. سونىمەن قاتار، باسقا وڭىرلەردە ينتەرناتۋرا مەن وردانيتۋرادا بىلىمدەرىن جەتىلدىرىپ، تاعلىمدامادان ءوتىپ جۇرگەن 122 اتىراۋلىق جاس مامان ىندەتپەن كۇرەسكە جۇمىلدىرىلاتىن بولادى. ق ر پرەمەر- ءمينيسترىنىڭ ورىنباسارى ەرالى توعجانوۆ ازاماتتاردىڭ كارانتيندىك تالاپتاردى مۇقيات ساقتاۋى ءۇشىن اتقارىلىپ جاتقان جۇمىستاردى كۇشەيتۋ قاجەتتىگىن تاپسىردى.