تورەگەلدى شارمانوۆ قىمىزدىڭ ءتورت ەرەكشەلىگىن ايتتى

None
None
نۇر-سۇلتان. قازاقپارات - حولەستەرين بار ەكەن دەپ، قوي ەتىنەن باس تارتۋ - قاتەلىك. مەديتسينا عىلىمدارىنىڭ دوكتورى، اكادەميك تورەگەلدى شارمانوۆ كوروناۆيرۋس ينفەكسياسىنىڭ الدىن الۋ جونىندە كەڭەس بەردى.

بۇل تۋرالى قازاقپارات Ortalyq Qazaqstan سايتىنا سىلتەمە جاساپ حابارلايدى.

«قوي ەتى - قورعاسىن» دەگەن ءسوز بار. ءبىراق، حولەستەرين بار ەكەن دەپ، قوي ەتىنەن باس تارتۋ - قاتەلىك. ءار ادامنىڭ اعزاسىندا تۇتىنعان تاعامنىڭ قۇرامىن رەتتەۋشى مەحانيزم بار جانە ول ۇزدىكسىز جۇمىس ىستەيدى»، - دەيدى تورەگەلدى شارمانوۆ.

ونىڭ ايتۋىنشا، جىلقى ەتىنىڭ كەرەمەتى سول، ونىڭ سىڭىمدىلىگى - قوي مەن سيىر ەتىنەن قاراعاندا 3 ەسە جىلدام.

«اتام قازاقتىڭ «جىلقى ەتى - توسەگىڭە جاتقانشا، سيىر ەتى - بوزارىپ تاڭ اتقانشا، قويدىڭ ەتى - كەلەسى كۇن باتقانشا» دەگەن قاناتتى ءسوز بار. مىنە، ءار ەتتىڭ ەرەكشەلىگىن وسىدان- اق اڭعارۋعا بولادى»، - دەيدى ول.

ونىڭ ايتۋىنشا، ناۋقاس ادامنىڭ اسقا تابەتى بولماۋى مۇمكىن. «ونداي جاعدايدا، قۇرت قوسىلعان سورپانى ءوزىن- ءوزى قيناسا دا، ىشۋگە تۋرا كەلەدى. اعزانىڭ قورعانىس قابىلەتىن ارتتىرۋ ءۇشىن بارىنشا قۇنارلى تاعام تۇتىنۋ قاجەت. ول - جىلقى ەتى، ول - قوي ەتى، ول - بالىق ەتى، ول - كوكونىس. قىمىز بەن قۇرت قوسىلعان سورپانى قايتالاپ ايتامىن. اسىرەسە، قىمىز - س دارۋمەنىنە وتە باي سۋسىن. ال، جىلقى ەتىنىڭ قۇنارى - بەكىرە بالىقتىڭ ەتىمەن دەڭگەيلەس. ءدامى ودان دا اسىپ تۇسەدى. قويدىڭ ەتى قورعاسىن ەكەن دەپ، ودان دا قول ۇزۋگە بولمايدى. مەيلىنشە، سۇيىق تاعامدى كوبىرەك ءىشۋ كەرەك»، - دەيدى عالىم.

ونىڭ ايتۋىنشا، قىمىزدى ىسىتىپ ءىشۋ - دۇرىس ەمەس.

«قىمىزدىڭ قۇرامىندا مىڭ سان دارۋمەن بار. ونىڭ ەڭ باستى ءتورت ەرەكشەلىگىنە توقتالساق، بىرىنشىدەن - قىمىز قۇرامىنداعى اقۋىزدىڭ «البۋميندىك» ءسىڭىمدى، نازىك تابيعاتى، ەكىنشىدەن - ونىڭ قۇرامىندا ترانسماي قىشقىلى جوق. بۇل مايدىڭ اعزاعا زيانى وتە كوپ. ءۇشىنشى ەرەكشەلىگى - قىمىز تابيعي انتيبيوتيك. ءتورتىنشى قاسيەتى - اشىتۋ پروتسەسى بارىسىندا پايدا بولاتىن ۆيرۋستار مەن باكتەريالاردى جويۋعا قابىلەتتى اسكوربين قىشقىلىنا (س دارۋمەنى) وتە باي»، - دەيدى ول.

بىرەۋ ايتتى ەكەن دەپ، قىمىزدى ىسىتىپ ىشۋگە بولمايدى. ەگەر، ولاي جاسايتىن بولساق، قىمىزدىڭ قۇرامىنداعى مەن ايتىپ وتىرعان دارۋمەننىڭ بارلىعى جويىلىپ كەتەدى.

«ەڭ دۇرىسى - قىمىزدى بولمە تەمپەراتۋراسىندا ءىشۋ. قىمىزدى توڭازىتقىشقا قويىپ، سالقىنداتۋعا دا بولمايدى. بيەنىڭ ءسۇتىن ساۋىلعان بەتتە جىلىداي ىشۋگە بولادى»، - دەيدى تاعامتانۋشى.

سوڭعى جاڭالىقتار