كوروناۆيرۋسقا شالدىققان ەلوردا تۇرعىنى: دارىگەرلەر اياعىمنان تىك تۇرعىزدى

نۇر- سۇلتاندا ينفەكسيالىق اۋرۋحانالاردىڭ پاتسيەنتتەرى دارىگەرلەرگە العىسىن ايتتى. 70 جاستاعى ساۋلە كوپەنوۆا وسىدان ءبىر اپتا بۇرىن اۋىر جاعدايدا اۋرۋحاناعا تۇسكەن.

«وتكەن اپتانىڭ سەنبىسىندە اۋرۋحاناعا ءتۇستىم. جاعدايىم اۋىر ەدى. ال قازىر، مىنە، شىققالى جاتىرمىن. جاعدايىم جاقسى. دارىگەرلەر مەن سانيتارلاردىڭ بارىنە انا رەتىندە زور العىسىمدى ايتقىم كەلەدى. تۋعان قىزدارىمداي كۇتىپ، ەمدەپ جاتىر. تاماعى دا جاقسى»، - دەيدى ساۋلە كوپەنوۆا.

ەربولات كۇرەبايەۆ تا دارىگەرلەردىڭ جۇمىسىن جوعارى باعالادى. اۋرۋحاناعا العاش تۇسكەن كەزدە جاعدايى ناشار بولعان. 10 كۇندەي ەمدەلگەن.

«دارىگەرلەر اياعىمنان تىك تۇرعىزدى. مەديتسينا قىزمەتكەرلەرىنە كوپتەن كوپ راحمەت»، - دەيدى ول.

ەلوردادا قازىرگى ۋاقىتتا ك ۆ ي جۇقتىرعانداردىڭ جارتىسى ەمدەلىپ شىققان. ناقتىراق ايتقاندا اۋرۋ جۇقتىرعان 6477 ادامنىڭ 3675 ى ەم-دومىن الىپ، ۇيىنە ورالدى. پاندەميا باستالعالى بەرى جالپى ەلوردادا ينفەكسيالىق توسەك- ورىنداردىڭ سانى 1 مىڭنان 4 ەسە كوبەيگەن. وسىلايشا، ستاتسيونارلاردىڭ سانى 14 كە جەتكىزىلدى.