تەكەس جايلاۋىنداعى قازاق بالالارىنىڭ اتپەن جارىسى - شەتەلدەگى قازاق ءتىلدى ب ا ق-قا شولۋ

جايلاۋداعى قازاق بالالارىنىڭ اتپەن جارىسى - قىتايدىڭ «ورتالىق حالىق راديوسى» (CNR)

وسى اپتادا قىتايدىڭ CNR اقپاراتتىق پورتالى «جايلاۋداعى قازاق بالالارىنىڭ اتپەن جارىسىپ ويناۋى» دەگەن تاقىرىپتاعى فوتورەپورتاجىن جاريالادى. اتالعان ب ا ق-تىڭ دەرەگىنشە، مالشىلاردىڭ بالالارى جازعى دەمالىسىن جايلاۋدا وتكىزۋدى جاقسى كورەدى.

«ىلە قازاق اۆتونوميالى وبلىسىنا قاراستى تەكەس اۋدانىنىڭ قازاق مالشىلارىنىڭ بالالارى تاۋ تابيعاتىمەن ەتەنە بولادى. ولار جايلاۋدا اتپەن قىدىرىپ، جازعى دەمالىسىن كوڭىلدى وتكىزەدى. بۇل بالالاردىڭ سونداي باقىتتى ساتىنەن ءتىلشىمىزدىڭ تۇسىرگەن سۋرەتتەرى»، دەپ جازادى قىتايلىق ب ا ق.

1500 جىلدىق تاريحى بار ايا-سوفيا مۋزەيدەن مەشىتكە اينالدى - TRT

پرەزيدەنت رەجەپ تايىپ ەردوعان مەملەكەت كەڭەسىنىڭ شەشىمىمەن ايا-سوفيانىڭ عيباداتقا اشىلۋىنا وراي اتالعان تاريحي عيمارات جەرگىلىكتى ءدىن ىستەرى باسقارماسىنا وتكىزىپ بەرىلدى جانە عيباداتقا اشىلۋىنا شەشىم قابىلدانعانىن جاريالادى، دەپ حابارلادى تۇركيا راديو تەلەديدار مەكەمەسىنىڭ رەسمي سايتى.

اتالعان اقپارات كوزىنىڭ دەرەگىنە سۇيەنسەك، مەملەكەت كەڭەسىنىڭ 10-دەپارتامەنتى ايا-سوفيانىڭ مەشىتتەن مۇراجايعا وزگەرتىلۋىنە بايلانىستى 1934 -جىلى 24-قاراشاداعى مينيسترلەر كابينەتى شەشىمىنىڭ كۇشىن جويدى. مەملەكەت كەڭەسىنىڭ شەشىمىمەن سان عاسىرلىق تاريحى بار ايا- سوفيا ەندى ءدىني قۇلشىلىق جاساۋ ورنى بولماق. ايا-سوفيانىڭ عيباداتقا اشىلۋىنا بايلانىستى پرەزيدەنتتىڭ شەشىمى رەسمي گازەتتە جاريالاندى.

ايتا كەتۋ كەرەك، ايا-سوفيا عيماراتى VI عاسىردىڭ 30-جىلدارىندا ۆيزانتيا يمپەراتورى يۋستينياننىڭ زامانىندا سالىنعان. ول مىڭداعان جىل بويى حريستيان الەمىندەگى ەڭ ءىرى شىركەۋ بولعان. 1453 -جىلى كونستانتينوپولدى وسمان يمپەرياسى باسىپ العاننان كەيىن، شىركەۋ اينالاسىنا ءتورت مۇنارا سالىپ، مەشىتكە اينالدىرعان. ايا- سوفيا 1934 -جىلى مۇراجايعا اينالدى.

1985 -جىلى UNESCO- نىڭ بۇكىلالەمدىك مۇرا تىزىمىنە ەندى.

وزبەكستان مەكتەپتەرىندە 4 ءپان ورنىنا ءبىر عانا ءپان ەنگىزىلمەك - «ءوزا» اقپارات اگەنتتىگى

وزبەكستانداعى «جالپى ورتا ءبىلىم بەرۋ مەكەمەلەرىندە» جاڭادان گۋمانيتار ءپان ەنگىزىلەدى، دەپ حابارلايدى «ءوزا».

وزبەكستاندىق ب ا ق-تىڭ دەرەگىنە سۇيەنسەك، وكىمەتتىڭ ءبىلىم سالاسى بويىنشا قابىلداعان قاۋلىسىنا وراي جالپى ورتا ءبىلىم بەرۋ مەكەمەلەرىندە «ادەپ»، «وتان سەزىمى»، «ۇلتتىق تاۋەلسىزدىك يدەياسى جانە رۋحانيات نەگىزدەرى» مەن «الەمدىك دىندەر تاريحى» پاندەرىن بىرىكتىرەتىن جالپى ورتا ءبىلىم بەرۋدەگى ءبىرىڭعاي «تاربيە» ءپانى 1-9 سىنىپتاردا 2020/2021 وقۋ جىلىنان باستاپ ەنگىزىلەدى.

ال، 10- 11 سىنىپتاردا بۇل وقۋ ادىستەمەسى 2021/2022 وقۋ جىلىنان باستاپ پاندەرگە بولىنگەن جالپى ساعاتتار شەگىندە كەزەڭىمەن ەنگىزىلەتىن بولادى.

وزگەگە سىيلاعان جاقسىلىقتان وزىڭىزدە كۇش-قۋات الاسىز - Kaznews

وسى اپتادا موڭعوليالىق Kaznews اقپاراتتىق پورتالىندا بايان-ولگەيلىك قانداسىمىز، ەكونوميست، كاسىپكەر باۋىرجان باقىتكەرەي ۇلىنىڭ سۇحباتى جاريالاندى.

بۇل سۇحباتتا ب. باقىتكەرەي ۇلى ءوز كاسىبىنە سايكەس، ەگىنشىلىك جايىندا كوپتەگەن سۇراقتارعا جاۋاپ بەرگەن ەكەن. ونىڭ ويىنشا، شىنايى نيەتىڭمەن تەك عانا جاقسىلىق ويلاساڭ، نيەتىڭە ساي ءبارى دە جاقسى بولادى. ول بۇل يدەيانى ءوزىنىڭ ومىرلىك ۇستانىمى رەتىندە قارايدى ەكەن. باۋىرجان باقىتكەرەي ۇلى 1981 -جىلى ولگەي قالاسىندا دۇنيەگە كەلگەن. 1999 -جىلى №II مەكتەپتى ءتامامداپ، 2003 -جىلى «زاساگت حان» ۋنيۆەرسيتەتىنەن ەكونوميست ماماندىعىمەن بىتىرگەن. 2004 -جىلى حاان بانك ورتالىعىندا ىشكى اۋديت باقىلاۋشىسى، 2010-2017 -جىلدارى ۇلانباتىر قالاسىنداعى «وگوومور» بازارى جانە «دراگون» اۆتوبەكەتىندەگى، بايان-ولگەي ايماعىنداعى «حاان بانك» بولىمشەلەرىندە ديرەكتور قىزمەتىن اتقارعان. موڭعوليانىڭ بايان- ولگەي ايماعىندا تۇرادى. قازىرگى قىزمەتى جىلىجاي شارۋاشىلىعىمەن اينالىساتىن «التىن ساپا» كومپانياسىنىڭ ديرەكتورى.

ول تابيعاتى قوڭىر- سالقىن بايان- ولگەيدە العاش قىسقى جىلىجاي سالعان ازاماتتاردىڭ ءبىرى ەكەن.

«...ەگىنشىلىك ۇنەمى اينالىمدا بولمايتىندىقتان باسقا كاسىپتەرگە قاراعاندا پايداسى ازداۋ. ءبىراق ادامعا بەرەتىن كۇش قۋاتى وراسان. پايدادان گورى قايتسەم جاقسى ءونىم الامىن، كىمگە قالاي كومەگىم تيەدى دەۋدى ويلاۋمەن بولاسىز. شىنايى نيەتىڭمەن تەك عانا جاقسىلىق ويلاساڭ، نيەتىڭە ساي ءبارى دە جاقسى بولادى. ۇناتىپ ىستەگەن شارۋادا شارشاۋ جوق، تەك جاقسى ەنەرگيا جينايسىز. قالاي پايدا تابامىن دەپ وزىڭە ۇناماسا دا ءبىر ىسپەن اينالىسۋ ادامدى كۇيزەلىسكە ۇشىراتادى. سوندىقتان ادامدارعا پايداسى تيەتىن، قىزىقتاپ ىستەيتىن ءىستى قولعا الساڭىز، جاقسى كوڭىل- كۇي، كۇش- قۋاتتى وزگەلەرمەن بىرگە وزىڭىزدە الاتىن بولاسىز» دەيدى كاسىپكەر باۋىرجان باقىتكەرەي ۇلى.

ناۋايداعى قازاقي كورىنىس - «ءوزا» اقپارات اگەنتتىگى

وسى اپتادا وزبەكستاندىق «ءوزا» اقپارات اگەنتتىگىندە «ناۋايداعى «ۇشتوبە» اۋىلىنداعى كورىنىس» دەگەن تاقىرىپپەن فوتورەپورتاج جارىق كوردى. اتالعان اقپاراتتاعى سۋرەتتەردە، قويدىڭ ءتولىن قولىنا ۇستاعان ەر ادامدارمەن قوسا، ۇلتىمىزدىڭ بوگەنايى سانالاتىن كيىز ۇيدە ۇلتتىق اسپاپتارىمىزدى ۇستاعان ونەرپازداردى، اسىق ويناعان بالالاردى كورۋگە بولادى.

«ناۋاي وبلىسى ورتالىعىنان 250 شاقىرىم جەردە ورىن تەپكەن، كەنيمەح اۋدانىنداعى ۇشتوبە اۋىلىنداعى بۇگىنگى كورىنىس» دەپ جازعان وزبەكستاندىق ب ا ق.

يراننىڭ قازاقستانعا ەكسپورتى 13 پايىزعا ارتتى - «فارس» اقپارات اگەنتتىگى

يراندا قازاقستان - يران بىرلەسكەن پالاتاسىنىڭ، يراننىڭ ساۋدا، ونەركاسىپ، تاۋ-كەن جانە اۋىل شارۋاشىلىعى پالاتالارى مەن جەكە سەكتور وكىلدەرىنىڭ قاتىسۋىمەن ەكسپورت جولدارىن دامىتۋ تاقىرىپتاردى تالقىلاۋعا ارنالعان وتىرىس ءوتتى، دەپ حابارلادى parstoday .

يراندىق ب ا ق-تىڭ دەرەگىنشە، يراننىڭ قازاقستانعا جاساعان ەكسپورتى بيىلعى ەكى ايدا وتكەن جىلدىڭ ۇقساس مەرزىمىمەن سالىستىرعاندا 13 پايىزعا ارتقان. يراننىڭ ساۋدانى دامىتۋ ۇيىمىنىڭ كەلتىرگەن مالىمەتىنە سايكەس، ەكى ەلدىڭ ساۋدا قارىم-قاتىناسىنا ءارتۇرلى سالالار ەنەدى. اتاپ ايتار بولساق، كولىك جاعدايى، اسىرەسە ترانزيتتىك تاسىمالداۋدى ارتتىرۋ، توڭازىتقىش كانتەينەرلەردى دايىنداۋمەن قاتار اقتاۋدا لوگيستيكالىق ورتالىق قۇرۋ جانە بانكىلىك ماسەلەلەردى شەشۋ، ۆيزا بەرۋدى جەڭىلدەتۋ. سونداي-اق، ساۋدا ورتالىق قۇرۋ، ەكسپورتتىق مۇمكىندىكتەردى ارتتىرۋ، ونەركاسىپتىك جانە كەن، اسىرەسە ترانس شەكارالىق اۋىلشارۋشىلىق سالالارداعى ىنتىماقتاستىق ماسەلەلەرى قاراستىرىلعان.

اۆتور: بەيسەن سۇلتان ۇلى