كوروناۆيرۋس: قازاقستاندا بۇگىن جالپى ۇلتتىق ازا تۇتۋ كۇنى

نۇر-سۇلتان ۋاقىتىمەن ساعات 12:00 دە بۇكىل ەل بويىنشا ءبىر مينۋتتىق ۇنسىزدىك جاريالانادى.

ق ر پرەزيدەنتى قاسىم-جومارت توقايەۆ 13 - شىلدەنى - ۇلتتىق ازا تۇتۋ كۇنى دەپ جاريالايتىنى تۋرالى ءمالىم ەتكەن بولاتىن.

ءتيىستى وكىمگە مەملەكەت باسشىسى كەلەسى كۇنى قول قويدى.

«ءار قازاق - مەنىڭ جالعىزىم» دەگەندەي، ءار ازاماتىمىزدىڭ قازاسى مەنىڭ جۇرەگىمە قاتتى باتادى. مىناۋ الاپات ىندەت ارامىزدان تالاي اسىلدارىمىزدى جۇلىپ اكەتۋدە. بۇگىندە قارا جامىلىپ وتىرعان ازاماتتاردىڭ قايعىلارىنا ورتاقتاسىپ، كوڭىل ايتامىن. سول ءۇشىن 13- شىلدەنى - ۇلتتىق ازا تۇتۋ كۇنى دەپ جاريالايمىن. ءبىراق، ءبىزدىڭ كۇرەسىمىز جالعاسا بەرەدى»، - دەدى قاسىم-جومارت توقايەۆ ءوز ۇندەۋىندە.

پرەزيدەنت بۇكىل كۇش جىگەرىمىزدى جيناپ، ىندەتپەن كۇرەسە بەرۋىمىز كەرەكتىگىن ايتتى.

مەملەكەت باسشىسى كوروناۆيرۋسقا قارسى قوسىمشا شارالاردى دا اتاپ ءوتتى: ناقتىراق ايتقاندا، ەلدە العاشقى مەديتسينالىق-سانيتارلىق كومەك كۇشەيتىلىپ، اۋرۋحانالاردا توسەك ورىندارىنىڭ سانى ارتتىرىلادى. قولدانىستاعى زەرتحانالار تەستىلەۋگە قول جەتىمدىلىكتى ارتتىرۋ ءۇشىن قايتا جابدىقتالىپ، پ ت ر- تەستىلەۋ ءۇشىن 8 موبيلدى ورتالىق قۇرىلادى. ونداي ورتالىقتار اۋىل-ايماقتاردا دا اشىلماق.

ەستەرىڭىزگە سالا كەتەيىك، قازاقستاندا كوروناۆيرۋس ينفەكتسياسىن جۇقتىرۋدىڭ العاشقى وقيعاسى وسى جىلدىڭ 13- ناۋرىزىندا تىركەلگەن ەدى. COVID-19 گەرمانيادان كەلگەن ەكى ازاماتتان انىقتالدى. 26- ناۋرىزدا قازاقستاندا كوروناۆيرۋستان بولعان ءبىرىنشى ءولىم تۋرالى حابارلاما كەلدى - 64 جاستاعى ايەل قايتىس بولدى.

ق ر پرەزيدەنتى جانىنداعى قازاقستان ستراتەگيالىق زەرتتەۋلەر ينستيتۋتىنىڭ ءبولىم باسشىسى الۋا جولدىبالينانىڭ ايتۋىنشا بۇعان دەيىن 4- ساۋىردە قىتايدا، 22- مامىردان باستاپ 3 كۇنگە - ا ق ش- تا، 27- مامىردان باستاپ 10 كۇنگە - يسپانيادا ازا تۇتۋ كۇنى جاريالانعان.

ويتكەنى وسى مەملەكەتتەردە اتالعان اۋرۋدان ەداۋىر ادام شىعىنى بولعان ەدى. سونىمەن بىرگە ساياساتتانۋشى قازاقستاندا 2019-جىلدىڭ 28- جەلتوقسانىندا جاريالانعان جالپى ۇلتتىق ازا تۇتۋ كۇنىنەن كەيىن اراعا جارتى جىل ۋاقىت سالىپ، كورونوۆيرۋس ىندەتىنەن ادامداردىڭ قازا بولۋىنا بايلانىستى قارالى كۇن جاريالانعانىن ايتادى.

جالپى تاۋەلسىزدىك العاننان باستاپ، ياعني 1991-جىلدان بەرى قازاقستاندا ازا تۇتۋ كۇنى توعىزىنشى رەت جاريالانىپ وتىر.

12- شىلدەدەگى جاعداي بويىنشا قازاقستاندا كوروناۆيرۋس ينفەكتسياسىن 58253 ادام جۇقتىرعان. 33814 ادام جازىلىپ شىعىپ، 264 ادام كوز جۇمعان.