تۇرعىن ۇيگە مۇقتاج ادامدار كەزەگىنە تۇرۋدىڭ تالاپتارى قانداي

None
None
الماتى. قازاقپارات - الماتىدا «Nur Otan» پارتياسىنىڭ اۋداندىق فيليالىندا وتكەن دوڭگەلەك ۇستەلدە مەملەكەتتىك باعدارلامالارعا قاتىسۋ ماسەلەلەرى تالقىلاندى، دەپ حابارلايدى قازاقپارات ءتىلشىسى.

م. اۋەزوۆ اۋدانىندا نايليا وردابايەۆانىڭ توراعالىعىمەن وتكەن ءىس-شاراعا تۇرعىن ءۇيدى ءبولۋ ءبولىمىنىڭ باس مامانى ريتا نۇربەك قىزى، «تۇرعىن ءۇي قۇرىلىس جيناق بانكى» ا ق مامانى شولپان ساناتوۆا، سونداي-اق اۋدان تۇرعىندارى قاتىستى.

ريتا نۇربەك قىزىنىڭ ايتۋىنشا، تۇرعىن ۇيگە مۇقتاج ادامداردى ەسەپكە الۋ ءۇشىن ءبىرىنشى كەزەكتە الماتى قالاسىندا ءۇش جىل تىركەۋى، مەنشىك قۇقىعىندا باسپاناسى بولماۋى قاجەت.

«5-10-20» باعدارلاماسى بويىنشا «تۇرعىن ءۇي قاتىناستارى تۋرالى» ق ر زاڭىنىڭ 67 جانە 68-باپتارىندا كورسەتىلگەن ازاماتتار ەسەپكە تۇرا الادى، بۇل حالىقتىڭ الەۋمەتتىك وسال توپتارى، مەملەكەتتىك قىزمەتكەرلەر، اسكەري قىزمەتشىلەر جانە تاعى دا باسقالارى.

«حالىقتىڭ الەۋمەتتىك وسال توپتارىنا ەكىنشى دۇنيەجۇزىلىك سوعىسقا قاتىسۋشىلارىنان باستاپ جەتىم بالالارعا دەيىنگى 11 سانات جاتادى. ولاردىڭ قاتارىندا زەينەتكەرلەر مەن ءبىرىنشى جانە ەكىنشى توپتاعى مۇگەدەكتەر، مۇگەدەك بالالاردى تاربيەلەپ وتىرعان كوپ بالالى وتباسىلار جانە ت. ب. بار. تولەم قابىلەتسىزدىگىنە بايلانىستى باعدارلامالارعا قاتىسۋعا مۇمكىندىگى جوق ازاماتتار مەملەكەتتىك تۇرعىن ءۇي قورىنان تۇرعىن ءۇي كەزەگىنە تۇرا الادى.

«5-10-20» باعدارلاماسىنا قاتىسۋ ءۇشىن باعدارلامانىڭ ءوز تالاپتارى بار، الەۋمەتتىك وسال حالىقتان باسقا زەينەتكەرلەر دە قاتىسا الادى، ءبىراق كەپىلگەرلەردىڭ (كەپىلگەردىڭ) بولۋى شارت»، - دەدى ول.

سونداي-اق، كەزدەسۋ بارىسىندا جاستارعا ارنالعان باعدارلامالارعا قاتىستى سۇراقتار قويىلدى.

«مەنىڭ قىزىم مىنە ۋنيۆەرسيتەتتى بىتىرگەننەن كەيىن ءبىر جىل جۇمىس ىستەيدى. بىلگىم كەلەتىنى، مەنىڭ وعان پاتەر ساتىپ الۋ مۇمكىندىگىم جوق. ءبىزدىڭ جاعدايدا نە ىستەۋ كەرەك؟»، - دەدى اۋدان تۇرعىنى.

بۇل جاعدايدا ريتا نۇربەك قىزىنىڭ ايتۋىنشا، ەكى باعدارلاما قاراستىرىلعان: «الماتى جاستارى» — بۇل قالا اكىمدىگى مەن تۇرعىن ءۇي قۇرىلىس جيناق بانكىنىڭ بىرلەسكەن جوباسى. وعان مەگاپوليستىڭ 35 جاسقا دەيىنگى جاستارى قاتىسا الادى. سونداي-اق، پاتەر ماسەلەسىن 29 جاسقا دەيىنگى جاستار ءۇشىن ساتىپ الۋسىز جالعا بەرىلەتىن تۇرعىن ءۇي باعدارلاماسىنىڭ كومەگىمەن ۋاقىتشا شەشۋگە بولادى.

مەملەكەتتەن پاتەردى 5 جىل بويى جالعا الۋعا مۇمكىندىك بار. بارلىق باعدارلامالار قالا اكىمدىگىنىڭ، تۇرعىن ءۇي قۇرىلىس جيناق بانكىنىڭ سايتىندا جانە تۇرعىن ءۇي ساياساتى باسقارماسىنىڭ سايتىندا جاريالانادى.

ءوز كەزەگىندە تۇرعىن ءۇي قۇرىلىس جيناق بانكىنىڭ سپيكەرى ماسەلەنىڭ قارجىلىق بولىگى، اتاپ ايتقاندا، قارىز مولشەرلەمەلەرى بويىنشا، باستاپقى جارنا تۋرالى، جيىنتىق تابىس قالاي ەسەپتەلەتىنى، باعدارلاماعا قاتىسۋ ءۇشىن ءوتىنىشتى قايدا جانە قالاي بەرۋگە بولاتىنى تۋرالى جانە باسقا دا كوپتەگەن ماسەلەلەر تۋرالى ايتىپ بەردى.

سوڭعى جاڭالىقتار