نۇر-سۇلتاندا سەنبى- جەكسەنبىدەگى اۋىل شارۋاشىلىعى جارمەڭكەسى جالعاسا بەرە مە؟

قالالىق اكىمدىكتىڭ مالىمەتىنە سەنسەك، «اسپان بازارى» ساۋدا ۇيىندە (قوشقاربايەۆ، 37) ءار دەمالىس سايىن اۋىل شارۋاشىلىعى جارمەڭكەسى وتكىزىلەدى. وندا شارۋا قوجالىقتارى مەن اۋىلشارۋاشىلىق تاۋار وندىرۋشىلەرىنىڭ ازىق- تۇلىك ونىمدەرى ۇسىنىلعان. «اسپان» باسشىلىعى جارمەڭكەگە قاتىسۋشىلارعا اقىسىز ورىن ۇسىنادى»، - دەيدى «اسپان» بازارىنىڭ اتقارۋشى ديرەكتورى ايتۋعان قۇلماحامبەت ۇلى.

تاۋارلاردى ساتاتىن كاسىپكەرلەر بارلىق جاعىنان قولايلى جاعداي جاسالعانىن اتاپ ءوتتى. سورەلەردە كوكونىستەر مەن جەمىستەر نارىق باعاسىنان تومەن ساتىلۋدا.

«ءبىز بۇل مۇمكىندىككە ريزامىز. قيار مەن قىزاناق قىمبات ەمەس. مىسالى، قيار باعاسى 350-400 تەڭگە، باسقا بازارلارمەن سالىستىرعاندا ءتيىمدى»، - دەيدى كاسىپكەر ليرا ءىلياسوۆا.

ءسىز سونداي-اق ءسۇت ونىمدەرى مەن جوعارى سورتتى ەتتى ارزان باعامەن ساتىپ الا الاسىز. اقمولا وبلىسىنىڭ شارۋا قوجالىقتارى مەن «باكارا» ج ش س سيىر ەتىنىڭ كەلىسىن 1750 تەڭگەدەن ۇسىنادى.

«ءىرى قارا ەتى 1750 تەڭگەدەن ساتىلۋدا. جىلقى ەتىنىڭ باعاسى 1900 تەڭگەدەن. بۇعان دەيىن سيىر ەتى 2000-2200، جىلقى ەتى 2400 تەڭگەدەن ساتىلاتىن. جارمەڭكەدە ءبىز باعانى تومەندەتەمىز»، - دەيدى كاسىپكەر رايحان شادانوۆا. جارمەڭكەنىڭ تۇراقتى كەلۋشىلەرى - جاقىن ماڭداعى تۇرعىندار. ء«بىز جاقىن ماڭدا تۇرامىز. باعاسى ارزان بولعان سوڭ وسىندا كەلەمىز. بۇل جەردە قىرىققابات پەن پيازدىڭ باعاسى 80 تەڭگە. باعالار جاقسى»، - دەيدى ەلوردا تۇرعىنى ۆەنەرا يزەيەۆا.

اقمولا جانە قاراعاندى ​​وبلىستارىنىڭ فەرمەرلەرى ازىق- تۇلىك ونىمدەرىن اكەلەدى.

«ءبىز وسى اۋداندا تۇرامىز. جارمەڭكە تۋرالى ەستىپ، باعالاردى باسقا ورىندارمەن سالىستىردىق. وتە ءتيىمدى جانە قول جەتىمدى. بۇگىن ۇن مەن ماي الۋعا كەلدىم. مۇندا ءبارى كوتەرمە باعامەن جانە وتە ارزان»، - دەيدى باۋىرجان دانيار ۇلى.

جارمەڭكە اپتا سايىن سەنبى مەن جەكسەنبىدە وتكىزىلەدى. ۇيىمداستىرۋشىلار كەلۋشىلەر سانيتارلىق نورمالاردى قاتاڭ ساقتاۋ كەرەگىن ەسكەرتەدى.

اۆتور: بالنۇر قوجاگەلدى