ەلىمىزدە سوتتالعان ازاماتتار قانداي كاسىپ تۇرلەرىمەن اينالىسادى

None
None
نۇر-سۇلتان. قازاقپارات – ق ر ىشكى ىستەر مينيسترلىگى قىلمىستىق اتقارۋ جۇيەسى كوميتەتىنىڭ ءتوراعاسى جانات ەشماعامبەتوۆ سوتتالعان ازاماتتار قانداي كاسىپ تۇرلەرىمەن اينالىساتىنىن ايتىپ بەردى، دەپ حابارلايدى قازاقپارات ءتىلشىسى.

«سوتتالعان ازاماتتاردى وقىتۋمەن قاتار، ءبىز ەڭبەككە جارامدىلارىنىڭ جازاسىن وتەۋ بارىسىندا جۇمىسپەن قامتىلۋىنا مۇددەلىمىز. جالپى بۇل ماسەلەلەر «ەڭبەك» باعدارلاماسىندا قاراستىرىلعان. ارينە، ءبىزدىڭ كاسىپورىنداردىڭ وندىرىستىك الەۋەتى ايتارلىقتاي كوپ ەمەس، الايدا ولار كۇردەلى جاعدايدا كاسىبىن دوڭگەلەتىپ وتىرعانىن اتاپ ءوتۋ كەرەك. نارىقتىق ەكونوميكا جاعدايىندا سوتتالعانداردىڭ ءبارىن دە ەڭبەككە تارتۋ قيىن، ءبىراق ماسەلە رەت- رەتىمەن شەشىلىپ كەلەدى. قىلمىستىق اتقارۋ جۇيەسىندەگى كاسىپورىنداردىڭ ونەركاسىپتىك- شارۋاشىلىق الەۋەتىن ارتتىرۋ، سول ارقىلى قوسىمشا جۇمىس ورىندارىن اشۋ باعىتىندا جۇمىستار جۇرگىزىلۋدە»، - دەدى جانات ەشماعامبەتوۆ IX ازاماتتىق فورۋم جۇمىسىنىڭ تاقىرىپتىق سەسسياسىندا.

قازىرگى ۋاقىتتا تۇرمەدە جازاسىن وتەپ جاتقان ازاماتتار مەتالل وڭدەۋ، اعاش وڭدەۋ، قۇرىلىس ماتەريالدارىن ازىرلەۋ، تىگىن بۇيىمدارى مەن باسقا دا تاۋارلاردى وندىرەتىن كاسىپورىنداردا ەڭبەك ەتىپ ءجۇر. قوسىمشا جۇمىس ورىندارىن اشۋ ءۇشىن بۇل سالاعا شاعىن جانە ورتا بيزنەس تە تارتىلىپ جاتىر ەكەن. ماسەلەن كاسىپكەرلىكتىڭ 237 سۋبەكتىسىنىڭ باسقارۋىنا وندىرىستىك الاڭ بەرىلگەن.

وسىنىڭ ارقاسىندا باس بوستاندىعىنان ايىرۋ ورىندارىندا 3 مىڭ جاڭا جۇمىس ورنى اشىلعان.

«بۇگىنگى تاڭدا قىلمىستىق اتقارۋ جۇيەسىندە جۇمىسقا جارامدى 14,2 مىڭ ازاماتتىڭ 11 مىڭى (77 پايىزى) ايلىعى تولەنەتىن جۇمىسپەن قامتىلعان. ودان تۇسكەن سوماعا سوتتالعاندار بوستاندىقتا بىرەۋگە كەلتىرگەن زالالىن، اليمەنتىن نەمەسە ايىپپۇلىن وتەيدى. كەيبىرى وتباسىنا كومەك كورسەتەدى. البەتتە وسى شارالاردىڭ ءبارى دە سوتتالعان ازاماتتاردى قوعامعا بەيىمدەۋگە سەپتىگىن تيگىزەدى»، - دەپ اتاپ ءوتتى ول.

سوڭعى جاڭالىقتار