فرانسيانىڭ بۇرىنعى پرەزيدەنتى نيكوليا ساركوزي سوت الدىندا جاۋاپ بەردى

None
None
نۇر-سۇلتان. قازاقپارات - جەمقورلىق جانە تەرگەۋگە زاڭسىز قىسىم كورسەتتى دەپ ايىپتالعان فرانسيانىڭ ەكس-پرەزيدەنتى نيكوليا ساركوزيگە قاتىستى پاريجدە تەرگەۋ باستالدى، دەپ حابارلايدى قازاقپارات Deutsche Welle-گە سىلتەمە جاساپ.

2007-2012-جىلدارى ەلدى باسقارعان 65 جاستاعى ساركوزي 10 جىلعا باس بوستاندىعىنان ايىرىلىپ، 1 ميلليون ەۋرو كولەمىندە ايىپپۇل تولەۋى مۇمكىن. ءىستىڭ ماتەريالدارى بويىنشا، نيكوليا ساركوزي 2014-جىلى ادۆوكاتى ارقىلى ەكس-پرەزيدەنتكە قاتىستى باستالعان كاسساتسيالىق سوتتا تەرگەۋ مالىمەتتەرىن الۋ ءۇشىن پروكۋرور جيلبەر ازيبەردى ساتىپ الماق بولدى دەپ ايىپتالىپ وتىر.

بولجام بويىنشا، 2007-جىلى ساركوزيدىڭ سايلاۋالدى كامپانياسىن L'Oreal كومپانياسىنىڭ مۇراگەرى، ميللياردەر ليليان بەتتانكۋر زاڭسىز قارجىلاندىرعان.

2013-جىلى ساركوزي بۇل كۇدىك بويىنشا اقتالىپ شىقتى. ءبىراق ادىلەت مينيسترلىگى ونىڭ قورعاۋشىسىمەن سويلەسكەن اڭگىمەسىن جازىپ، سول كەلىسسوزدەر ەكس-پرەزيدەنتكە قارسى باسقا ءىستىڭ اشىلۋىنا سەبەپ بولدى.

ساركوزي تاعىلعان كىنانى جوققا شىعارىپ وتىر. بۇل وقيعا - سوعىستان كەيىنگى فرانسيا تاريحىندا بۇرىنعى مەملەكەت باسشىسىنىڭ سوت الدىندا العاش رەت جاۋاپ بەرۋى.

2011-جىلى فرانسيانىڭ ەكس-پرەزيدەنتى جاك شيراك وكىلەتتىلىگىن اسىرا پايدالاندى جانە قوعامدىق قورلارداعى اقشانى ءتيىمسىز جاراتتى دەگەن ايىپپەن شارتتى تۇردە ەكى جىلعا باس بوستاندىعىنان ايىرىلعان بولاتىن. ءبىراق ول دەنساۋلىعىنا بايلانىستى بىردە-ءبىر سوت وتىرىسىنا قاتىسقان جوق. 2019-جىلى شيراك 86 جاسىندا قايتىس بولدى.

سوڭعى جاڭالىقتار