قىتاي توپىراق ۇلگىسىن اكەلۋ ءۇشىن ايعا عارىش اپپاراتىن ۇشىردى

None
None
بەيجىڭ. قازاقپارات - قىتاي سەيسەنبى كۇنى وڭتۇستىك قىتايداعى حاينان ارالدىق پروۆينتسياسىنداعى ۆەنچان اۋە ايلاعىنان ايدى زەرتتەۋ ءۇشىن «چانە-5» زوندى بار «چانچجەن-5» زىمىرانىن ۇشىردى، دەپ حابارلايدى قازاقپاراتتىڭ مەنشىكتى ءتىلشىسى ق ح ر مەملەكەتتىك عارىش باسقارماسى (م ع ب) حابارلاماسىنا سىلتەمە جاساپ.

زوندتىڭ مىندەتى - ايدىڭ بەتىنەن توپىراق ۇلگىسىن جيناپ، جەرگە جەتكىزۋ.

«چانە-5» اي زوندى جەرگە 2 كەلى توپىراق ۇلگىسىن اكەلەدى دەپ جوسپارلانىپ وتىر.

ەسەپ بويىنشا، عارىش اپپاراتى ايدىڭ بەتىنە بيىل جەلتوقساننىڭ باسىندا قونادى. جالپى زوندتىڭ ۇشۋ ۋاقىتى 20 كۇننەن اسادى. سالماعى 8,2 توننا «چانە-5» زوندى وربيتالىق، قونۋشى، قايتۋشى جانە ۇشۋ مودۋلدەرىنەن تۇرادى.

م ع ب عارىش ينجەنەرياسى جانە ايدى زەرتتەۋ ورتالىعىنىڭ وكىلى پەي چجاويۋيدىڭ ايتۋىنشا، «بۇل ميسسيا عارىشكەرلەردىڭ ايعا ۇشىپ، عارىشتى تەرەڭ مەڭگەرىپ، سىناما الىپ، مارستان، استەرويدتان جانە باسقا دا اسپان دەنەلەرىنە ۇشۋ ءۇشىن نەگىزگى ىرگەتاس بولماق».

«چانە-5» زوندى مودۋلدەرىن اي ماڭىنداعى وربيتادا تۇيىستىرۋگە نەگىزدەلگەن كۇردەلى تەحنولوگيالىق ءتاسىل ايداعى پيلوتتىق ميسسيالارعا تەحنولوگيالىق نەگىز بولۋعا مۇمكىندىك بەرەدى»، - دەپ اتاپ ءوتتى قىتايلىق ساراپشى.

ەسكە سالا كەتسەك، ايدى زەرتتەۋگە ارنالعان قىتاي باعدارلاماسى 2004-جىلى ىسكە قوسىلدى. ول ءۇش كەزەڭنەن تۇرادى: ايدى اينالىپ ۇشۋ، ونىڭ بەتىنە قونۋ جانە جەرگە ايداعى توپىراق ۇلگىسىن جەتكىزۋ.

سوڭعى جاڭالىقتار