نۇرلان نوعايەۆ ەلىمىزدەگى گاز كولەمىن اتادى

بۇل تۋرالى بۇگىن ۇكىمەت وتىرىسىندا ق ر ەنەرگەتيكا ءمينيسترى نۇرلان نوعايەۆ ايتتى، دەپ حابارلايدى قازاقپارات ءتىلشىسى.

«ەڭ الدىمەن گاز رەسۋرستارى ەلدىڭ ىشكى قاجەتتىلىگىن قامتاماسىز ەتۋگە جەتكىلىكتى ەكەنىن اتاپ وتكىم كەلەدى. قور جونىندەگى مەملەكەتتىك كوميسسيا 3,8 تريلليون تەكشە مەتر كولەمىندە وندىرىلەتىن گاز قورىن بەكىتتى. ونىڭ ىشىندە ىلەسپە گاز - 2,2 تريلليون تەكشە مەتر جانە تابيعي گاز - 1,6 تريلليون تەكشە مەتر. بارلىق بارلانعان گاز قورىنىڭ 98 پايىزعا جۋىعى - قازاقستاننىڭ باتىسىندا، بۇل رەتتە 87 پايىزدان استامى - ءىرى مۇناي-گاز جانە مۇناي-گاز كوندەنساتى كەن ورىندارىندا شوعىرلانعان»، - دەدى ول.

ءمينيستردىڭ ايتۋىنشا، ەلىمىزدىڭ ءىرى كەن ورىندارى - قاشاعان، قاراشىعاناق، تەڭىز قورى قازاقستان رەسپۋبليكاسىنىڭ بۇكىل قورىنىڭ 75 پايىزىن قۇرايدى.

«وندىرىلەتىن گازدان قاجەتتى كولەم ىشكى نارىققا، ءبىر بولىگى ەكسپورتقا، ءبىر بولىگى قىسىمدى ۇستاپ تۇرۋ ءۇشىن قاباتقا ايداۋعا جانە جەر قويناۋىن پايدالانۋشىلاردىڭ جەكە تەحنولوگيالىق مۇقتاجدارىنا جۇمسالادى»، - دەدى نۇرلان نوعايەۆ.